Todo o mundo debería ter un escúter de 125 centímetros cúbicos no garaxe, pero cando saímos do trazado urbano os 125 quedan curtos. E aquí entran modelos como a brillante Yamaha Xmax 300.
17 jun 2018 . Actualizado ás 05:00 h.A nova Xmax 300 ten un deseño moderno, con faros led diante e detrás, intermitentes integrados na carrocería e dúas grandes asas que facilitan ao pasaxeiro agarrarse. O asento é cómodo e amplo, conta cun pequeno respaldo que suxeita moi ben a zona lumbar e as plataformas para os pés son moi anchas.
O cadro de mandos ten un estilo clásico e elegante, con dúas grandes esferas analóxicas para o velocímetro e o cuentarrevoluciones e unha pantalla dixital no medio. Nela pódese consultar moita información, incluíndo os datos do computador de abordo, nivel de carburante, temperatura do motor e carga da batería.
Baixo o asento hai un oco iluminado con capacidade para dous cascos integrais e máis cousas. Ademais, no escudo atopamos dúas profundas guanteras; unha delas conectada ao peche centralizado e cunha toma de 12 voltios para cargar dispositivos.
MOTOR
A Xmax 300 ten un motor monocilíndrico que rende case 28 cabalos. É incrible o que se pode facer con esta potencia, porque aínda que non ten unha saída explosiva e parece que empurra pouco, acada rapidamente os 100 quilómetros por hora e segue subindo sen inmutarse. Supera con fartura as velocidades legais e pode manter cruceiros de 140 quilómetros por hora sen esforzo. Se queremos unha resposta máis brusca podemos desconectar o control de tracción, pero non é recomendable.
A estabilidade en curva é boa, cuns pneumáticos que parecen pegarse ao asfalto. A suspensión tira a dura, aínda que talvez sexa unha sensación influída pola lamia traseira de 14 polgadas, pero isto é un hándicap de todos os escúteres de roda baixa. A moto pesa 179 quilos en orde de marcha, así que movela en parado ou inclinala non é problema. A freada é un pouco esponxosa, probablemente debido ao ABS e a que só ten un disco dianteiro e outro traseiro, pero suficiente para o peso e a potencia declarados.
A moto protexe moi ben a parte superior das pernas e todo o tronco desde a cintura ata o casco. O aire nótase só nos pés e nos brazos, porque loxicamente non pode cubrir tanto como un maxiescúter. A pantalla deriva ben o vento e non notamos turbulencias cando imos a alta velocidade por autoestrada.
SEN CHAVE
Abonda levar un mando connosco e podemos arrincar o motor, abrir o cofre ou a guantera mediante unha roda e uns botóns situados no centro do escudo. Se nos afastamos e non está apagada ou hai algo que non está pechado, emite uns asubíos de advertencia.
PREZO
A Xmax 300 costas 5.800 euros e o consumo medio son 3,3 litros aos 100 (o depósito é de 13 litros, así que dá unha autonomía media de 400 quilómetros). Se queremos un extra de potencia, a Xmax 400 ten o mesmo deseño e dimensiones pero 5 cabalos máis e dobre disco dianteiro.
Tracer 900 GT, agora máis rutera
A Tracer 900 converteuse nunha das superventas de Yamaha grazas á unión do poderoso motor tricilíndrico (115 CV e unha resposta ao puño inmediata) da MT09 cunhas suspensións e un deseño xeral pensado para viaxar. Agora dá unha volta de porca a este concepto coas siglas GT, que a transforman nunha touring de altos voos. Tres son os cambios principais respecto da versión normal e que xustifican sobradamente os 1.800 euros máis que costa: o panel de instrumentos totalmente dixital e en cor; as maletas laterais (de 22 litros cada unha e extracción rápida) a xogo coa cor da carrocería, e o cambio rápido ou quickshifter. Este último permite, a partir de 4.500 revolucións, aproximadamente, subir de marchas sen necesidade de apertar a maneta de embrague, maximizando así as prestacións.
Con control de cruceiro e puños calefactables, caballete central de serie e melloras no asento, os estribos e a asas para o pasaxeiro, a comodidade está garantida. A pantalla pode regularse e existe unha opcional máis alta.
Á parte destes detalles non poder esquecer que mantén o efectivo chasis de aluminio, que garante o equilibrio entre lixeireza e resistencia, e alongouse o basculante para mellorar a estabilidade en recta. A electrónica, con control de tracción regulable en dous niveis (coa posibilidade de desconectalo), e tres modos de condución, completan un conxunto moi atractivo.