A gama Adventure de KTM é unha prolífica colección de motocicletas coas que se pode combinar a estrada co «off road», limitado iso si, e onde elixiremos ademais entre tres diferentes potencias e cilindradas. A 1090 e a 1290 son bo exemplo desta versatilidade.
17 jun 2018 . Actualizado ás 05:00 h.A 1090 Adventure substituíu desde hai meses á antiga 1050, cun motor renovado para adaptarse á nova normativa Euro4 e ao mesmo tempo ter un pouco máis de brillo grazas aos seus 125 cabalos de potencia. Aínda que os que teñan carné A2 poden pedir unha versión limitada. Con esta potencia adicional gañouse en brillantez en cruceiros e tamén máis axilidade en estradas de montaña.
A Adventure goza duns compoñentes de primeira liña, como freos Brembo e suspensións WP, e pode engadir ao seu equipamento as maletas que lle sintan tan ben.
Ademais destaca pola xestión da súa electrónica, que permite configurar diferentes modos de resposta do motor, así como o control de tracción. O modo de condución off road pode pedirse opcionalmente.
A nivel de uso diario é unha moto que satisfai a calquera público. Ten un cadro de instrumentos multifunción e adaptable e a iluminación de día é de luces LED. Ademais, a opción de asento axustable permite a pilotos de pouca altura sentirse máis cómodos. O seu prezo, que rolda os 12.000 euros, vai en liña coa súa competencia.
Un chanzo máis arriba da KTM 1090 Adventure está a 1290 Super Adventure S, que é a versión máis deportiva da gama e o seu buque insignia. É unha moto que pode presumir de tecnoloxía avanzada como as suspensións electrónicas semi activas, ou o acelerador electrónico.
No concernente ao motor falamos dunha potencia de 160 cabalos que a converten na máis deportiva da familia, combinada ademais cun cambio asistido que permite manexalo sen accionar o embrague nin cortar o gas. Pero tampouco se esquece a 1290 Super Adventure S da comodidade con detalles como o control de arranque en costa, que a frea nestas situacións, o que facilita as cousas cun peso de 215 quilos.
O prezo acada os 17.500 euros, pero será a elixida polos que queiran unha top nesta categoría.
As Duke, para o asfalto
P ara aqueles que consideraban KTM como unha marca off road, chegou a gama Duke e convenceulles que no asfalto tamén se saben comportar.
A gama Duke ten tres escalas, 690, 790 e 1290, polo que se pode dicir que hai unha para cada tipo de cliente.
A 790 Duke é unha moto cunha estética moi agresiva, cun faro dianteiro de mosca, partido pola metade e con luces LED. Tamén a forma do depósito contribúen á súa aparencia rechamante.
O motor da 790 Duke é a súa peza mestra, un bicilíndrico de 105 cabalos que funciona moi ben axudado por un embrague hidráulico e unha caixa de cambios de seis velocidades. O seu peso de só 169 quilos faina moi áxil e manexable. Unha moto que invita a conducións dinámicas e divertidas e que ao mesmo tempo se pode manexar con certa facilidade en cidade.
1290 SUPERDUKE GT
No máis alto da gama de asfalto sitúase a KTM 1290 Superduke GT, unha moto para gozar en calquera estrada pola súa polivalencia. O seu motor bicilíndrico lonxitudinal en V acada os 173 cabalos de potencia, que permiten aceleracións fulgurantes co quick shifter, que permite subir marchas sen piedade e sen utilizar o embrague.
As suspensións semi activas e os modos de condución, entre o que se conta o Rain (choiva) facilitan o manexo dunha moto que pesa 205 quilos pero que namora a primeira vista. O prezo de venda ao público desta moto é de 18.590 euros.
Coa gama Duke e Superduke, KTM aséntase no asfalto.