O terceiro implicado maior de idade quedou en liberdade coa obrigación de presentarse ante o xuíz unha vez ao mes
31 jul 2021 . Actualizado ás 12:39 h.Dous dos tres adultos presuntamente implicados na brutal malleira a un mozo en Amorebieta ingresaron onte en prisión sen fianza. Así o decidiu o xulgado encargado do caso, tras pasar os detidos a disposición xudicial unha vez finalizados os trámites policiais. O terceiro maior de idade, de 38 anos, foi posto en liberdade con obrigación de presentarse ante o xuíz unha vez ao mes.
O resto dos oito implicados, cinco menores de idade, ingresaron xa en centros de menores. Todos eles foron detidos entre a tarde do mércores e a mañá do xoves nas localidades de Baracaldo, Bilbao e Erandio. Os sospeitosos teñen entre 15 e 38 anos.
A policía vasca coñecía desde hai moito tempo aos Irmáns Koala. É o grupo xuvenil e violento do que forman parte os oito detidos pola malleira brutal que o domingo deixou en estado crítico a Alexandru Andrei Ionita, de 23 anos e veciño de Lemoa. Ocorreu en Amorebieta e na agresión participaron unha vintena de persoas, segundo a investigación da Ertzaintza. Por iso o conselleiro de Seguridade, Josu Erkoreka, non descartou o xoves máis detencións. Erkoreka apuntou que os detidos xa tiñan antecedentes policiais por organización violenta e agresións. Algúns deles estiveran tutelados pola Deputación de Biscaia, aínda que antes da agresión xa non dependían deste organismo.