O partido de Abascal cre que a ministra de Dereitos Sociais puido cometer un delito de odio
07 may 2021 . Actualizado ás 19:37 h.Vox anunciou este venres a presentación dunha querela ante o Tribunal Supremo contra a ministra de Dereitos Sociais, Ione Belarra, por ter chamado a esta formación «nazis de cara» nun mitin da campaña electoral ás eleccións madrileñas, informa Efe.
O partido encabezado por Santiago Abascal considera que a ministra podería ter cometido un delito de odio contemplado no artigo 510 do Código Penal e solicita ao Supremo que a chame a declarar e practique diversas dilixencias para confirmar a veracidade das manifestacións que fixo en Collado Villalba (Madrid) o 25 pasado de abril.
Mediante un comunicado, a vicesecretaria xurídica do partido, Marta Castro, asegura que a expresión empregada por Belarra obedece a «un discurso articulado, premeditado e intencionado» que afecta á súa formación e tamén aos seus «militantes e votantes», recolle Efe.
E engade que «a adxectivación como nazis, como mostra dos máis horrendos crimes perpetrados contra o ser humano, pretende que todos os oíntes aos que van dirixidos equiparen a Vox con estas actuacións que recibiron por parte de toda a comunidade a súa máis enérxica condena».