A secretaria xeral da formación asegurou hoxe que non é «responsable» do asalto ao Capitolio, polo que os «motivos» para concederlle o galardón «seguen vixentes»
20 ene 2021 . Actualizado ás 18:54 h.A horas de que Trump abandone a Casa Blanca, a secretaria xeral de Vox no Congreso dos Deputados, Macarena Olona, asegurou que o presidente dos Estados Unidos non é «responsable» do asalto ao Capitolio, polo que os «motivos» para concederlle o Nobel da Paz «seguen vixentes».
Nunha entrevista en TVE, recollida por Europa Press, Olona destacou que Trump é o «primeiro presidente desde 1980 que non levou aos estadounidenses a unha guerra», e pediu agardar á finalización do mandato de Joe Biden para ver se o novo presidente pode dicir o mesmo.
Neste contexto, a dirixente de Vox insistiu en que ningún líder político «pode facerse responsable das accións dos cidadáns», nin sequera do ocorrido no Capitolio, que foi asaltado por partidarios do propio Trump durante a certificación da vitoria de Joe Biden.
«Cualificar o ocorrido como un golpe de estado, as escenas son dantescas por canto supoñen a interrupción do funcionamento da cámara e a soberanía popular», continuou, segundo recolle Europa Press, pondo en cuestión que os que teñan criticado esas accións» sexan os mesmos que «alentaron accións mais gravosas como o rodea o Congreso» ou o Parlamento andaluz.
Así, segundo Olona os motivos para conceder ao dirixente a «alta distinción seguen vixentes», posto que non se produciu ningún feito que enerve a concesión do recoñecemento». «Non facemos responsable a Trump do ocorrido no Capitolio», insistiu, culpando á «manipulación dos medios» a atribución do ataque ao presidente.
Ao seu xuízo, «non hai ningunha palabra que alentase ou que xustificase» o asedio, e o propio Trump condenou «enerxicamente» o suceso. Para rematar, Olona lamentou que en España se chegase a dicir» que Vox apoiaba os «disturbios» na Cámara estadounidense cando o líder do partido, Santiago Abascal, e posteriormente, di, «todos os dirixentes» o teñan condenado.