As enquisas disparan aos populares, que poderían obter uns 17 escanos máis. O PSOE tamén crece, aínda que de forma máis moderada
19 sep 2019 . Actualizado ás 12:02 h.As eleccións «as carga o diaño», advertiu Pablo Casado desde o seu escano a Pedro Sánchez. As enquisas apoian ao líder do Partido Popular. A repetición dos comicios o próximo 10 de novembro benefician, principalmente, ao seu partido. O bipartidismo sae reforzado, tal e como pasou tres anos atrás cando Mariano Rajoy non logrou apoios suficientes para ser investido e volveu sacar as urnas en xuño, pero é o PP quen mellor proveito saca da nova convocatoria.
Casado supera os 66 escanos que obtivo o 28A en todos os escenarios debuxados polas enquisas publicadas desde o mes pasado. De media, aumenta en 17 deputados a súa representación, a máis baixa da historia desde a súa refundación baixo as siglas actuais.
Na réplica ao presidente do PP, Pedro Sánchez afeou, a el e ao resto de líderes da oposición, o rexeitamento a permitir a súa investidura e desexou unha maioría «máis rotunda» para o PSOE o 10N. As sondaxes aumentan o grupo socialista no Cogreso, pero non tanto a súa vantaxe. O PSOE sumaría uns 12 novos escanos, aínda que a diferenza co PP seguiría sendo similar ou, mesmo, veríase reducida.
O outono pinta escuro para Cidadáns, Podemos e Vox. A baixada de participación, o desgaste durante o bloqueo a Sánchez e a chamada ao voto útil desde os dous grandes partidos minaría as opcións destas formacións de manter o seu actual número de representantes. Albert Rivera, que tratou de dar un golpe de efecto nas últimas horas das negociacións brindando un pacto con Sánchez para absterse na sesión de investidura, perdería unha media de doce deputados. A caída de Podemos é máis moderada, con seis menos, mentres que Vox restaría sete, rozando o mesmo número de escanos que ERC, a quen a repetición electoral podería chegar a darlle un deputado máis.
Nas próximas semanas observaranse as consecuencias do fracaso das negociacións para investir a Sánchez. Segundo os lectores de La Voz, a través dunha enquisa publicada na web, o principal responsable da repetición electoral sería o propio líder socialista, polo que as seguintes sondaxes podería repercutir na vantaxe que mantén o partido sobre o resto de formacións.
Só o pacto PSOE-Cs garante a maioría absoluta
Pedro Sánchez e Pablo Iglesias parecen condenados a non volver entenderse -aínda que a última vez que o fixeron foi fai case un ano, cando presentaron o proxecto dos Orzamentos para o 2019 asinado por ambos os líderes-. A pesar de todo, a suma de escanos de ambos os partidos si acadaría a maioría absoluta en 3 das 15 enquisas publicadas desde agosto. Polo centrodereita, o PP nunca consegue abarcar suficientes deputados dos seus socios para acadar os 176 deputados.
Si darían as contas para PSOE e Cidadáns, un pacto imposible para a formación laranxa. Ou, polo menos, así o foi durante os últimos meses de bloqueo político. En 13 das 15 sondaxes recompilados, a alianza entre ambos os partidos supera a maioría absoluta.