«Verédesme á saída», di o rei Juan Carlos tras ingresar para a súa operación de corazón
ESPAÑA
O rei emérito ingresa na clínica madrileña e segundo algunhas fontes colocaranlle tres bypass
24 ago 2019 . Actualizado ás 11:04 h.O rei Juan Carlos ingresou na Clínica Quirón de Pozuelo de Alarcón (Madrid) este venres para someterse a unha intervención cirúrxica cardíaca, en lugar do sábado como tiña previsto inicialmente. Segundo algunhas fontes, os médicos colocaranlle tres bypass no corazón.
Aínda que nun primeiro momento o ingreso estaba programado para o sábado --o mesmo día da intervención-- o rei emérito ingresou ao redor das 22.00 horas nas instalacións médicas. Antes de entrar, as cámaras captaron como o monarca saudaba aos medios que agardaban ás portas da clínica. «Verédesme á saída», asegurou desde o interior do vehículo, cando os xornalistas lle preguntaron como se atopaba, segundo Efe
A operación do rei emérito levaba programada para finais deste mes de agosto desde a última revisión médica feita ao monarca os pasados días 11 e 12 de xuño. Tras a revisión de xuño, o rei Juan Carlos fixo vida normal e mesmo participou o pasado 9 de agosto no Campionato de Mundo de Vela en Finlandia, no que o seu barco, o Bribón Movistar, revalidou o seu título de campión do mundo de 6 Metros.
