A documentación e as placas de matrícula eran alteradas en países do estranxeiro para que o vehículo roubado parecese legal
18 jun 2019 . Actualizado ás 12:17 h.A Policía Nacional desarticulou, coa detención de nove persoas en diferentes provincias españolas, unha ourganización criminal dedicada ao roubo de todo terreos de luxo mediante un novo sistema de falsificación e que tiña vinte vehículos no seu poder que valían un millón de euros. Nesta operación foron arrestadas nove persoas en Guipúzcoa (1), Calatayud (4), Alcobendas (1) e Madrid (3), acusadas de roubar coches de luxo na Comunidade de Madrid, cambiarlles a matrícula e outros elementos identificativos e vendelos no estranxeiro.
A banda estaba composta por cidadáns búlgaros especializados tanto na subtracción de vehículos como nunha nova falsificación. A documentación e as placas de matrícula eran alteradas en países do estranxeiro, fundamentalmente en Suecia, e posteriormente enviadas a España para falsificar elementos como as matrículas e o número de bastidor. Con este novo método o coche roubado obtiña unha aparencia de legalidade que permitía entregalos a condutores da organización que os trasladaban fóra de España. Ademais, para evitar ser descubertos durante o proceso, desprazábanse a zonas despoboadas, nas que a vixilancia resultaba moi difícil.
Case dous anos de investigacións
A investigación comezou a finais do 2017, cando os axentes recuperaron na zona de Valdebebas de Madrid un vehículo con matricúlaa dobrada que fora subtraído na localidade de Las Rozas.
Tras varias xestións descubriron que un cidadán armenio obtivera 24 placas de matrícula de xeito fraudulento, e todas elas correspondían a vehículos dunha mesma marca e foron entregadas a outros integrantes da organización, que nese momento non estaban identificados. Logo constataron que todas as placas se utilizaban para matricular vehículos -en Francia, Bulgaria e Finlandia- que foran subtraídos en España. E finalmente, grazas ás canles de cooperación policial, os axentes lograron intervilos.
Co avance da investigación os axentes observaron que se trataba dunha organización perfectamente estruturada na que cada un dos seus membros, altamente especializados, desempeñaba unha función determinada.
Por unha banda, estaban as persoas dedicadas á subtracción dos coches, cuxos prezos oscilaban entre os 30.000 e os 60.000 euros, e por outro os encargados de falsificar os elementos identificativos e a documentación para pólos en circulación.
Tamén había persoas encargadas da comercialización dos vehículos en terceiros países, que utilizaban condutores especializados de nacionalidade búlgara e armenia para trasladar os automóbiles ao leste europeo, utilizando sempre placas de matrícula falsificadas de Suecia.
Os investigadores detiveron a un dos condutores da organización en Guipúzcoa, cando intentaba abandonar España cun vehículo subtraído, e pouco despois recuperaron un vehículo de alta gama que fora subtraído en Madrid e identificaron os seus ladróns. A partir de entón constataron que a organización subtraía os vehículos na Comunidade de Madrid, principalmente no distrito madrileño de Hortaleza e na zona de Pozuelo.
Ademais, conseguiron recuperar varios dos coches que foran subtraídos e que a organización tiña arrefriando en diversas rúas da capital coas placas de matrícula falsificadas.
Na última fase da investigación, os axentes detiveron aos nove integrantes da organización e interviñeron útiles como dispositivos electrónicos de última xeración para o roubo de coches, documentación e placas de matrícula falsas, un fracturador e extractor de bombines, e stickers e números de bastidor.