David Serrano está investigado por un presunto delito de homicidio imprudente
03 jul 2019 . Actualizado ás 14:01 h.Os pais de Julen, o neno de dous anos que morreu o pasado 13 de xaneiro ao caer a un pozo en Totalán (Málaga), presentaron un escrito no que solicitan a continuación do procedemento penal contra o dono da leira onde estaba a prospección, David Serrano.
Este escrito foi cursado pola letrada dos pais de Julen, Antonia Barba, despois de que a titular do Xulgado de Instrución número 9 de Málaga reclamase ás partes presentadas no procedemento que se pronunciasen sobre a solicitude de novas dilixencias.
Neste sentido, Antonia Barba sinalou que non pediu novas dilixencias de proba pero que entende que debe continuar a causa contra o único investigado.
Este luns deuse a coñecer o informe definitivo da autopsia realizada a Julen, que determina que o pequeno faleceu pola caída ao pozo e que sufriu traumatismo cranioencefálico e raquimedular, polo que descarta a posibilidade de que morrese polo golpe dunha picaraña nos labores de rescate.
