Van protagonizar ata mañá unha axenda que inclúe, ademais dunha reunión e unha cea de gala ofrecida por Mohamed VI , a firma de case unha ducia de acordos e memorandos bilaterais
13 feb 2019 . Actualizado ás 18:39 h.Os reis iniciaron esta tarde a súa primeira viaxe de Estado a Marrocos onde, invitados por Mohamed VI , van protagonizar ata mañá unha axenda que inclúe, ademais dunha reunión e unha cea de gala ofrecida polo monarca marroquí, a firma de case unha ducia de acordos e memorandos bilaterais.
Don Felipe e dona Letizia foron despedidos no pavillón de Estado do aeroporto Adolfo Suárez de Madrid pola presidenta do Congreso, Ana Pastor, o presidente da Comunidade de Madrid, Angel Garrido, o delegado do Goberno nesa comunidade, José Manuel Rodríguez Uribes, e o Xefe do Estado Maior da Defensa (JEMAD), Fernando Alejandre Martínez.
Tras a cerimonia con honras militares, os reis subiron ao avión da Forza Aérea Española no que se desprazan a Marrocos, informa Efe. Na súa visita estarán acompañados por cinco ministros: os de Asuntos Exteriores (Josep Borrell), Interior (Fernando Grande-Marlaska), Industria (Reyes Maroto), Agricultura (Luis Planas) e Cultura (José Guirao).
Entre os acordos bilaterais que se prevén asinar durante a visita, un deles ten como obxectivo reforzar a loita contra a delincuencia organizada. Tamén se asinará outro para establecer un partenariado estratéxico en materia de enerxía e de desenvolvemento dunha terceira interconexión enerxética entre os dous países.
Esta é a primeira visita de máximo nivel de Felipe VI ao país veciño desde a súa proclamación en xuño de 2014 e a sétima en todo este período, despois das de Francia , México, Portugal, Xapón, Reino Unido e Perú.
Mohamed VI e Felipe VI reúnense antes da firma de acordos
Mohamed VI e Felipe VI mantiveron hoxe unha breve reunión no Palacio Real de Rabat despois da cerimonia oficial de benvida dos reis de España. Don Felipe e dona Letizia chegaron esta tarde a Rabat, onde foron recibidos no aeroporto por Mohamed VI , os seus fillos, o príncipe herdeiro, de 15 anos, a súa filla, Lalla Khadija, de 11, e os seus catro irmáns. Desde o aeroporto, desprazáronse en coche ao Palacio Real, onde tivo lugar a cerimonia oficial de benvida.