Casado, Rivera e Abascal, os líderes de PP, Cidadáns e Vox, foron recibidos en Colón ao berro de «presidente, presidente», aínda que haberá que agardar aos comicios xerais -sexan cando sexan- para saber quen deles logrou rendibilizar máis unha foto á que os dous primeiros eran, ata onte, máis que remisos.
Porque tanto nas filas conservadoras como nas da formación laranxa hai voces moi críticas coa conveniencia de aparecer da man -aínda que sexa en sentido figurado- do grupo de ultradereita recentemente chegado ás institucións. E, aínda que de momento Vox só ten representación no Parlamento andaluz, todo apunta a que terá espazo nas Cortes na próxima lexislatura, polo que podería non ser tan boa idea aumentar a súa visibilidade outorgándolle o status de adversario en plano de igualdade a formacións consolidadas. A iso únese o receo de PP e C's a contribuír a «blanquear» a imaxe do partido de Abascal, algunhas de cuxas propostas -desde formulacións xenófobas ata acabar co Estado das autonomías- son contrarias aos principios constitucionais.
«As tres dereitas», como onte as bautizou Pedro Sánchez, insisten en ser diferentes no fondo e nas formas, como quedou patente nas declaracións dos seus líderes. Casado e Rivera mostráronse moito máis moderados, a pesar da contundencia nas críticas á «traizón» do Goberno respecto de Cataluña e á esixencia de comicios, mentres que Abascal foi máis aló. «O golpe debe sufocarse ata as últimas consecuencias, coa detención dos seus responsables e os seus instigadores», dixo, en referencia ao presidente da Generalitat e aos CDR. Logo, feita xa a famosa foto, Vox acusou a C's de subir ao escenario máis representantes dos pactados (os líderes políticos e os xornalistas que leron o manifesto). A carreira electoral xa comezou.