Torra reclama diálogo a Sánchez e ao PSOE para evitar outro 155: «Non o permitan»
ESPAÑA
Arrimadas acusou ao presidente catalán de pertencer ao «club de fans da guerra dos Balcáns»
12 dic 2018 . Actualizado ás 13:24 h.O presidente da Generalitat, Quim Torra, reclamou este mércores ao presidente do Goberno, Pedro Sánchez, volver ao camiño do diálogo entre Generalitat e Estado e apelou ao PSC e ao PSOE para que non se aplique de novo o artigo 155: «Non o permitan».
Na sesión de control ao Govern no Parlament, segundo informa Europa Press, encerellouse coa líder de Cs, Inés Arrimadas, quen esixiu que se interveña de novo a autonomía catalá mostrando un papel cun gran 155 impreso.
Torra criticou o xesto da xefa da oposición en Cataluña : «É unha ameaza? Soa a ameaza. Deixen de ameazarnos», ao que Arrimadas replicou que os únicos que ameazan, ao seu xuízo, son os Comités de Defensa da República (CDR).
O presidente catalán advertiu, informa Europa Press, de que non hai artigo da Constitución que lle poida facer renunciar ás súas formulacións políticas: «Perdemos o medo por todo o que pasou estes anos, porque Cataluña se fixo máis forte en democracia e dereitos civís».
A líder de Cidadáns acusou ao presidente da Generalitat de pertencer a un «club de fans da guerra dos Balcáns», da que «talvez» é «un pouco nostálxico», unha acusación, segundo recolle Efe, que verteu tamén contra o novo conseller de Acción Exterior, Alfred Bosch.
«Na súa república imaxinaria, señor Torra, en Eslovenia non houbo mortos, só un referendo. Pois si, houbo mortos e unha guerra. (...) Son talvez un pouco nostálxicos da guerra dos Balcáns», agregou Arrimadas.
Arrimadas, doutra banda, considerou que Bosch non foi nomeado novo conseller para «mellorar a xestión» do Govern, senón por un «intercambio de cromos» dentro dunha ERC con «problemas internos».