Únese aos independentistas para que o Concello de Barcelona reprobe a Felipe VI tras a decisión do Executivo de recorrer ao Constitucional unha moción similar do Parlamento catalán
27 oct 2018 . Actualizado ás 05:00 h.O Concello de Barcelona aprobou onte unha resolución para reprobar a Felipe VI . O texto, que saíu adiante cos votos de Barcelona en Comú, PDECat, Esquerra e a CUP, «rexeita e condena o posicionamento do rei Felipe VI » na súa «intervención no conflito catalán» e a «xustificación» por parte do xefe do Estado da violencia exercida polos corpos policiais no referendo ilegal do 1-O. Horas despois de que o Goberno anunciase que levará ao Constitucional a resolución do Parlamento autonómico sobre o rei, o consistorio barcelonés deu luz verde a unha declaración institucional que «aposta pola abolición dunha institución caduca e antidemocrática como a monarquía» e reafirma o compromiso do Concello cos valores republicanos.
A figura do rei está en cuestión por parte das forzas soberanistas, a raíz do discurso que pronunciou Felipe VI o 3 de outubro de hai un ano, dous días despois do referendo ilegal. Segundo as exposición de motivos da resolución aprobada polas forzas soberanistas no consistorio (co rexeitamento de Cidadáns, PSC e PP), o rei emitiu un discurso ameazador contra unha parte da poboación que di representar e co que tratou de preservar a unidade de España a calquera prezo, exercendo «unha das funcións polas cales a ditadura franquista lle outorgou privilexios».
Esta non é a primeira iniciativa que adopta o Concello de Barcelona contra a institución monárquica. A Delegación do Goberno denunciou ao actual equipo de goberno de Ada Colau, que ao pouco de tomar posesión decidiu retirar o busto do rei Juan Carlos, porque facía un ano que xa non era xefe do Estado. Unha sentenza xudicial obrigou a Colau a colgar o cadro coa foto do monarca no «lugar preferente e de honra» do edificio municipal da capital catalá.
Crítica de Torra
O presidente da Generalitat, Quim Torra, tamén replicou ao Goberno, tras a súa decisión de seguir adiante coa impugnación da resolución do Parlamento catalán. «Presidente Sánchez, se esta é a súa idea de diálogo, de non judicialización da política e de respecto pola liberdade de expresión, imos en direccións contrarias», apuntou nun chío.
