Un subsahariano morreu no asalto masivo á barreira fronteiriza do domingo. O Goberno ha utiizado o mesmo método que en Ceuta en agosto
22 oct 2018 . Actualizado ás 14:07 h.España expulsou a 55 dos 209 inmigrantes que onte lograron pasar o valo fronteiriza de Melilla tras un novo salto masivo producido o domingo e no que morreu un subsahariano.
Segundo explicou hoxe a Delegación do Goberno na cidade autónoma e recolle Europa Press, «o Goberno aplicou o tratado hispanomarroquí de readmisión a 55 persoas, que están a ser trasladadas neste momento a Marrocos».
O portavoz da delegación desvelou ademais que «140 persoas acolléronse á solicitude de dereito de asilo», polo que permanecen todos eles en Melilla pendentes da resolución dos seus expedientes e que «tres inmigrantes foron confirmados como menores» polos que son acollidos en aplicación da lexislación vixente en materia de acollemento de menores.
Para rematar, indicou que dos 19 inmigrantes que resultaron feridos o domingo no salto «cinco seguen hospitalizados» e outras «cinco contan con lesións que non requiren hospitalización, pero si repouso».
O portavoz gobernamental non ofreceu este luns novidades sobre o caso do inmigrante falecido despois de que o domingo avanzase que se lle practicase unha autopsia para coñecer as causas do seu falecemento, aínda que subliñaba que todo parece indicar que se produciu por mor dunha parada cardiorrespiratoria.
O Goberno seguiu nesta ocasión en Melilla o mesmo sistema que puxo en marcha en Ceuta en agosto pasado coa expulsión de 119 inmigrantes que saltaron o valo ceutí como resposta á violencia empregada polos inmigrantes, que usaron cal vivo, bólas de feces e sprays para sortear aos axentes da Garda Civil.
No caso de Melilla deste domingo resultaron feridos seis axentes, aínda que ningún deles requiriu hospitalización, pero non se precisou como se lesionaron os axentes nin se se empregaron os mesmos materiais que en Ceuta para superar aos gardas civís.