O Goberno ignorou un informe sobre vítimas civís de bombas intelixentes en Iemen

O Goberno evitou un informe do Consello de Seguridade das Nacións Unidas do 2017 que verificou o uso de bombas aéreas de precisión láser en Iemen que causaron 292 vítimas civís. As conclusións do documento desmenten a alegación realizada por varios ministros do Executivo de que este armamento de precisión «non causa danos colaterais», caso do titular de Exteriores, Josep Borrel, ou da portavoz, Isabel Celaá. Ambos o fixeron para xustificar finalmente a venda a Arabia Saudita de 400 bombas destas características por 9,2 millóns de euros, un contrato que foi paralizado en agosto polo Ministerio de Defensa para a súa revisión. Esta circunstancia provocou o enfado do comprador e reformulouse a adquisición de cinco corvetas á compaña pública española Navantia por 1.800 millóns. As presións internas e externas fixeron que o presidente, Pedro Sánchez, interviñese para pór fin a esta crise.

O informe da ONU non deixa lugar ás dúbidas de que estas bombas intelixentes mataron a civís en Iemen. Asegura que a coalición internacional encabezada por Arabia Saudita vulnerou o dereito internacional «polo menos en dez ataques aéreos» contra vivendas, mercados, fábricas e un hospital. Este documento elaborouse en virtude da resolución 2266 tras o golpe de estado neste país árabe no 2014, que renovou as sancións e o embargo colectivo de armas aos bandos adversarios: os hutíes (aliados con Saleh ata a súa morte), que controlan as terras do norte e están apoiados por Irán , e o Goberno lexítimo do presidente Hadi, apoiado por unha alianza liderada por Arabia Saudita.

O grupo de expertos, coordinado polo coronel marroquí Ahmed Himmiche, investigou, entre outros, dez ataques aéreos da coalición internacional que causaron a morte só no 2016 de polo menos 292 civís, dos cales 100 eran mulleres e nenos. Os ataques tamén destruíron tres edificios residenciais, tres complexos industriais civís, un hospital e un mercado. En oito destas operacións, os cazas sauditas usaron bombas guiadas por láser, ou intelixentes, de orixe estadounidense.

Os ataques máis mortíferos en Iemen foron dous bombardeos a un mercado o 15 de marzo do 2016 na localidade de Haia, con 106 mortos e 41 feridos, e a unha funeraria civil o 8 de outubro dese ano na capital, Saná, con 132 mortos e 695 feridos, segundo documentan os investigadores a partir de datos da ONU ou de Médicos Sen Fronteiras.

Ataque desproporcionado

Neste último caso, dúas bombas aéreas explotaron sobre o salón comunitario, ou dentro del, nunha zona residencial do suroeste de Saná onde había congregados máis de mil asistentes ao funeral do pai do ministro do Interior do Goberno rebelde. Prevíase que asistise un número considerable de dirixentes políticos e militares leais aos hutíes e a Saleh. O grupo de expertos obtivo as imaxes orixinais das probas físicas atopadas tomadas despois das explosións e ao analizalas comprobou que tanto a forma como as dimensións dos fragmentos correspondían «ás aletas e aleróns do sistema de guía GBU-12 Paveway II montado nunha bomba aérea de alto explosivo Mark 82».

A conclusión é que a única parte do conflito que usa este material é a coalición encabezada por Arabia Saudita, que «non atendeu» a solicitude de información realizada polo grupo de expertos, incumprindo a resolución da ONU. O ataque, engaden, «causou un número moi elevado de baixas civís que debería preverse», non se respectou o dereito internacional humanitario relativo á proporcionalidade e, se se tomaron medidas de precaución, «resultaron en gran medida insuficientes e ineficaces».

Este armamento é similar ao que o Goberno español vendeu a Arabia Saudita. Trátase de 400 bombas de precisión láser pertencentes ao Exército español que foron adquiridas ao fabricante estadounidense e que se gardaban nunha nave dunha base militar en Aragón tras asinar o contrato no 2015, durante o Goberno popular.

A execución do citado contrato causou unha crise coas autoridades sauditas pola paralización inicial do contrato polo Ministerio de Defensa. O motivo exposto polo departamento dirixido por Margarita Robles foi a revisión do citado acordo ante o temor de que este material fose usado contra poboación civil en Iemen, do que deixa constancia este informe do Consello de Seguridade da ONU. Este documento foi ignorado polo Goberno para superar a crise cun dos seus principais compradores de material de defensa, pero contradí o argumento dos ministros Borrell ou Celaá de que as bombas son de precisión «e non se van a equivocar matando iemenís».

---

---

---