Ademais do seu paso polo Congreso e polo Senado, outro dos requisitos cos que ten que cumprir o Goberno antes de aprobar os novos obxectivos de estabilidade orzamentaria é o visto e prace do Consello de Política Fiscal e Financeira (CPFF) . Tal e como estaba previsto, onte salvou este escollo sen grandes dificultades, grazas ao voto favorable do Ministerio de Facenda e das comunidades autónomas gobernadas polo PSOE.
O Executivo presentou exactamente o mesmo marxe de déficit e de débeda que o pasado xullo, é dicir, aumentando dúas décimas o déficit público para o 2019, do 0,1 % actual ao 0,3 %, e establecendo como obxectivos o 0,1 % para o ano 2020 e o déficit cero para o seguinte curso. En canto aos obxectivos de débeda pública do conxunto das comunidades, a proposta para os próximos tres anos é a seguinte: o 23,7 % para o 2019, un 23 % para o 2020 e do 22,2 % para o exercicio do 2021.
O resultado final foi o mesmo que o pasado xullo: aprobado. A favor pronunciáronse as sete comunidades gobernadas polos socialistas, Cantabria (independente, pero próxima a Ferraz) e a representante da Administración central, a ministra María Jesús Montero. En contra situáronse, unha vez máis, os territorios gobernados polo PP. Entre eles Galicia. Como anunciara o día anterior, a Generalitat catalá non participou na reunión.
«Máis débeda para vos galegos»
Desde Facenda xustifican o sentido do seu voto do mesmo xeito que hai un mes: «Implica máis débeda para vos galegos», apuntan desde a consellería. Na súa opinión, a proposta do Goberno central supón na práctica un premio ás comunidades que non cumpriron, e en cambio prexudica aos territorios que si se axustaron ás regras de financiamento, entre as que se atopa Galicia. Ademais, desde San Caetano aproveitan para esixir ao Goberno que asuma o compromiso adquirido pola ministra de Facenda nun encontro que mantivo en Madrid hai dúas semanas co presidente da Xunta, Alberto Núñez Feijoo, no que María Jesús Montero se comprometeu a solucionar o problema derivado do cambio en período de cálculo da liquidación do IVE e que suporía 200 millóns menos para Galicia.
O visto e prace do Consello de Política Fiscal e Financeira é un requisito imprescindible e o punto de partida para que tanto o Goberno como as comunidades autónomas comecen a debuxar os seus Orzamentos para o próximo ano. No entanto, as cifras aprobadas onte mantéñense á espera de que as aprobe o Consello de Ministros (previsiblemente na súa reunión de mañá). Aínda así seguirán sendo papel mollado ata que sexan aprobadas polo Congreso e polo Senado. E se Pedro Sánchez xa ten dificultades para sacala adiante na Cámara Baixa, a maioría absoluta da que goza o PP na Alta antóllase infranqueable.
A reunión de onte celebrouse de forma telemática. Os representantes de todas as comunidades repetiron o mesmo voto que en xullo, salvo o da Comunidade Valenciana (PSOE), que pasou da abstención ao si a cambio de 850 millóns de euros adicionais.