O marido da infanta Cristina chegou ás 12.15 á Audiencia de Palma onde o tribunal lle notificou a súa condena de 5 anos e 10 meses por corrupción
13 jun 2018 . Actualizado ás 13:59 h.A Audiencia Provincial de Palma deu cinco días ao ex duque de Palma, Iñaki Urdangarin, para que ingrese en prisión, segundo informaron desde a Audiencia. O marido da Infanta chegou a dependencias xudiciais sobre as 12.15 horas, acompañado do seu avogado Mario Pascual Vives, para recibir a orde de entrada en prisión e saíu sobre as 12.27.
Á súa chegada, algúns dos curiosos presentes berráronlle berros de «chourizo», «os Borbóns ás quenllas», «Borbón a prisión». Durante o tempo que estivo na Audiencia, tamén lle berraron «Iñaki, xa basta, devólvenos a pasta». Á súa saída, tamén lle proferiron berros e insultos persoais.
Ao ser un ingreso voluntario, durante este tempo o exduque non terá a mobilidade limitada e podería volver a Suíza ata a data en que se materialice o seu ingreso, informa Europa Press.
A Sala do Penal do Tribunal Supremo rebaixou en cinco meses -ata os 5 anos e 10 meses- a condena inicial polo caso Nóos para o marido da Infanta Cristina, Iñaki Urdangarin. O exduque fora penado con seis anos e tres meses de cárcere pola Audiencia Provincial de Palma por varios delitos relacionados coa actividade da citada entidade sen ánimo de lucro.
A expectación era máxima desde as 9.15, hora na que aterraba o avión co cuñado do rei, procedente de Xenebra, onde ten a súa residencia. Decenas de fotógrafos, cámaras de televisión e redactores agardaban ante a sede do tribunal.
Matas xa dorme hoxe na prisión de Aranxuez
O que non se presentou ante a Audiencia, a pesar de estar citado foi o ex presidente do Govern, Jaume Matas, xa que decidiu ingresar de forma voluntaria na prisión de Aranxuez. Así o confirmaron fontes xurídicas a Europa Press.
A Sala II do Supremo ratificou a condena a tres anos oito meses de cárcere a Matas por un delito continuado de prevaricación en concurso medial cun delito de falsidade en documento público e cun delito de malversación de caudais públicos.
O exsocio de Urdangarin, Diego Torres si que acudiu hoxe á cita coa xustiza e fíxoo ás 9.01 da mañá. Do mesmo xeito que o marido da infanta, Torres ten cinco días para ingresar no cárcere e cumprir a condena de 5 anos e 8 meses polo caso Nóos, informa Efe.
O Tribunal Supremo rebaixou onte en 2 anos e 10 meses a condena inicial da Audiencia a Torres. Confirmou a condena por un delito continuado de prevaricación en concurso con malversación e por fraude á Administración e delito contra Facenda, e absolveulle de tráfico de influencias e branqueo.
O tribunal que ditou a sentenza do caso Nóos en primeira instancia entregou ao empresario e economista a orde para que entre en prisión, que ten que facerse efectiva, como máximo, o vindeiro luns, día 18.
Torres, que chegou á sede da Audiencia un minuto despois do inicio do prazo que lle deu o tribunal (de 9.00 a 14.00), presentouse acompañado do seu avogado, Manuel González Peeters, con quen abandonou o edificio xudicial pasada media hora e subiuse a un taxi sen facer declaracións.
O exsocio de Urdangarin poderá presentarse coa orde de prisión no centro penal español que elixa para iniciar o cumprimento da pena imposta onte polo Tribunal Supremo (TS).
Os numerosos xornalistas que flanquean as portas da sede da Audiencia de Palma agardan a chegada dos outros dous condenados a penas de prisión no caso Nóos, o esposo da infanta Cristina, Iñaki Urdangarin, e o expresidente balear Jaume Matas.
Sobre o cuñado do Rey pesa unha sentenza firme por varios delitos de corrupción pola que se lle impuxo unha pena de 5 anos e 10 meses de prisión.
