Montoro admite no Congreso que puido haber «falseamiento de facturas» para financiar o referendo
ESPAÑA
O ministro de Facenda díxoo hoxe durante unha réplica no Congreso a Albert Rivera
26 abr 2018 . Actualizado ás 12:46 h.O ministro de Facenda e Función Pública, Cristóbal Montoro, admitiu este xoves no Congreso que «pode haber falseamiento de facturas» por parte da Generalitat de Cataluña que posibilitasen o financiamento con diñeiro público do referendo de independencia do 1 de outubro.
«Claro que si, pode haber falseamiento de facturas. Como vou dicir o contrario?. Pode habelas», dixo, durante a súa réplica ao presidente de Cidadáns , Albert Rivera, no debate de totalidade do proxecto de Orzamentos Xerais do Estado de 2018.
Neste sentido, invitou a Rivera a «ler de verdade» a súa entrevista no Mundo, pois dixo que nela non descartaba que puidesen falsearse documentos. «Onde digo que non hai falseamiento de facturas?. Digo o contrario», xustificou.
«Sabe o que é un procedemento administrativo?», preguntou a Rivera, contestándose seguidamente cun «non o sabe». «Non me diga que si. Como vai sabelo, se non estivo a cargo de ningunha xestión directa?», apostilou.
Nunha comparecencia ante a Comisión de Facenda e Función Pública días antes do referendo do 1 de outubro, o ministro asegurou que unha das probas polas que non se ía celebrar tal votación era que a Generalitat non dedicara nin un euro para iso. Tanto el como o presidente Mariano Rajoy aseguraron que non se destinaron recursos públicos para o referendo.
