A Mesa do Parlament aproba o voto delegado de Comín que pode facilitar a investidura

A Mesa do Parlamento de Cataluña admitiu hoxe a delegación do voto do exconseller e actual deputado de ERC Antoni Comín, que se atopa en Bélxica pendente de saber se é extraditado ou non en virtude da euroorden impulsada polo xuíz do Tribunal Supremo Pablo Llarena. Así, JxCat e ERC xa teñen suficientes votos para investir a un novo presidente sen necesitar o apoio da CUP.

A Mesa admitiu a solicitude presentada por Comín para delegar o seu voto no portavoz do grupo parlamentario de ERC, Sergi Sabrià «durante o tempo que dure» a imposibilidade de acudir ao hemiciclo, posto que non pode abandonar Bélxica á espera de que as autoridades xudiciais se pronuncien sobre a extradición.

A admisión da delegación do voto a Comín súmase á xa admitida previamente do expresidente Carles Puigdemont, por atoparse en Alemaña pendente tamén de que se decida a petición de extradición, e ambas as delegacións de voto poderían facilitar o desbloqueo da investidura porque en segunda volta non se necesitaría o apoio da CUP. 

---

---

---