O expresidente reúne hoxe en Bruxelas ao grupo parlamentario de Junts per Catalunya antes do pleno de constitución do Parlament, coa súa investidura aínda no aire
12 ene 2018 . Actualizado ás 14:22 h.O expresidente catalán, Carles Puigdemont, anunciou hoxe que puxo en funcionamento a web o «Govern da República», que usa o logotipo da Generalitat e inclúe noticias e unha dirección de correo electrónico, en paralelo á web oficial da Generalitat.
Nunha mensaxe na súa conta de Twitter, Puigdemont publicou desde Bruxelas unha concisa mensaxe coa dirección desta web, «governrepublica.org», e a etiqueta «República Catalá».
Na web figura unha notificación que anuncia que, fronte á «situación de indefensión xurídica e institucional do Govern lexítimo de Cataluña ante a agresividade política e xudicial do Estado español, a Asociación de Xuristas Drets dará cobertura legal á Oficina do Govern lexítimo de Cataluña, o ente de información oficial do president, vicepresident e consellers do Govern xurdido democraticamente das urnas do 27 de setembro de 2015».
A web do «Govern da República» usa a denominación tamén de «Govern da Generalitat» e o logotipo oficial da administración catalá.
Tamén inclúe un apartado de noticias, coa mensaxe que deu Puigdemont en fin de ano, e outro para dirixirse a este «Govern» a través dunha dirección de correo electrónico.
Puigdemont publicou a web o día no que reúne en Bruxelas ao grupo parlamentario de Junts per Catalunya antes do pleno de constitución do Parlament, coa súa investidura aínda no aire.
