Envía á Moncloa un escrito no que esixe que se reverta a represión», pero o Goberno non considera válida a súa resposta e lémbralle que ten un segundo prazo, ata o xoves, para explicar as medidas que vai adoptar para recuperar o cumprimento das súas obrigacións
19 oct 2017 . Actualizado ás 10:18 h.O presidente da Generalitat, Carles Puigdemont, optou por non contestar especificamente a Mariano Rajoy se declarou ou non a independencia de Cataluña o pasado martes. En lugar de aclarar o requirimento cun si ou un non, como lle demandou o Goberno central, o presidente catalán optou por remitir unha carta de catro folios na que en definitiva lle devolve a pelota a Rajoy, para emprazarlle a que sexa el quen acepte agora a apertura dun diálogo directo entre os dous mandatarios.
En lugar de aterse á pregunta, Puigdemont dá un prazo de dous meses ao presidente do Goberno para desenvolver ese diálogo, sen sinalar que pasaría en caso de non aceptarse a súa petición. «A nosa proposta de diálogo é sincera, a pesar de todo o ocorrido, pero loxicamente é incompatible co actual clima de crecente represión e ameaza», di o responsable da Generalitat na súa misiva.
Con todo, desde o Goberno non se considera válida, por falta de claridade, a resposta por carta de Puigdemont. A vicepresidenta do Goberno, Soraya Sáenz de Santamaría, reprochou a Puigdemont que non teña respondido ao requirimento e advertiulle que ante a súa falta de resposta, actívase o segundo prazo para que rectifique antes do xoves. «Non era moi difícil dicir se si ou non declarara a independencia», dixo Santamaría nunha comparecencia no Palacio da Moncloa, na que recalcou que «prolongar a incerteza e a confusión deliberada só favorece a quen pretende liquidar a concordia cívica e impor un proxecto radical e empobrecedor».
A vicepresidenta advertiu a Puigdemont de que o seu chamamento ao diálogo «non resulta crible» tendo en conta que el se negou a debater coa oposición catalá e está a facer «política de feitos consumados» e «impondo as súas posicións ao conxunto da cidadanía». «O diálogo non se esixe, practícase», insistiulle.
Ademais, desvelou que o presidente do Goberno, Mariano Rajoy, respondeu por escrito a Puigdemont e, entre outras cousas, puntualizoulle que aplicar o artigo 155 da Constitución non é para suspender o autogoberno senón para que este se exerza no marco da legalidade, e que é a propia Generalitat quen derrogou o Estatut.
Na súa carta, Puigdemont reclama como primeiro punto da súa resposta que se reverta a represión contra o pobo e o goberno de Cataluña», incluíndo nesa descrición a declaración ante a Audiencia Nacional que hoxe están chamados a realizar os presidentes de ANC e Omnium Cultural, ademais do maior dos Mossos d'Escuadra, Josep Lluís Trapero e outra dos mandos principais do corpo.
O presidente autonómico engade no capítulo de reproches «a vulneración de dereitos fundamentais, a intervención e conxelación de contas bancarias», que di están impedindo a atención económica con «as persoas máis necesitadas».
A carta enviada á Moncloa conclúe cunha petición de reunión a Mariano Rajoy «canto antes, que nos permita explorar os primeiros acordos». «Non deixemos que se deteriore máis a situación», incide mentres é presionado pola CUP para convocar esta semana un pleno solemne de declaración da independencia, ou en caso contrario levar o conflito á rúa mediante paros e concentracións.
O líder da Asemblea Nacional Catalá, Jordi Sánchez, foi un dos primeiros en situarse respecto da resposta de Puigdemont, avalando a súa formulación.
Desde o PP, Xavier García Albiol, tacha xa na súa conta de Twitter de «incosciente» a Puigdemont pola súa resposta.
