Anpas Galegas, ao conselleiro sobre os recortes de docentes: «O diálogo non é algo que se poida escoller»
EDUCACIÓN
Agarda un diálogo coa Xunta porque «detrás de agosto chega setembro» e anuncia mobilizacións
04 sep 2021 . Actualizado ás 14:10 h.As familias de estudantes agrupadas en Anpas Galegas lanzou unha especie de ultimato ao conselleiro de Educación: ou se senta a negociar a dotación de profesores extra para o próximo curso ou en setembro os terá «enfronte, con claridade». O presidente do colectivo, Fernando Lacaci, explica por que: «Non podemos consentir ter un señor que cree que pode facer o que lle dea a gana», porque, lembra, «o diálogo non é algo que se poida escoller» xa que «a consellería non é propieitaria do ensino, é a encargada, coxunturalmente, de xestionalo».
Ás familias de Anpas molestoulles e moito que tras un inicio de curso que prometía mellores relacións cos dirixentes autonómicos —cando o propio Román Rodríguez destituíu a tres grandes referentes da consellería, Manuel Corredoira, José Manuel Pinal e Jesús Oitavén— a experiencia halles demostrado que «a consellería fai as cousas sen informar, sen dar lugar ao debate e no período non lectivo». É, en palabras de Lacaci, «un chalaneo».
Exactamente que piden? Profesores, docentes suficientes para un curso que se considera de transición, con moitas aprendizaxes pendentes pola pandemia e unha situación xeral de abatemento na comunidade educativa (a sociedade en xeral). Segundo os datos de que dispón Anpas —e que se refiren a un estudo feito polo sindicato CIG Ensino— o próximo curso elimínanse só en secundaria 435 prazas que estiveron ocupadas no 20/21 (por desdóbrelos da pandemia) e case 200 sobre as existentes antes do covid. Hai, din, uns cen centros afectados, dos 250 que imparten secundaria na escola pública.
Os profesores, explicaba Lacaci en rolda de prensa, non se limitan a entrar na aula, impartir unha clase e marcharse. Eles foron os artífices de que este ano a educación galega fose un exemplo: «A consellería di que todo funcionou moi ben, e foi porque houbo moita máis xente», porque non é o mesmo controlar unha clase de 30 alumnos a unha de 16. Os profesores encargáronse de vixiar os corredores, de atender o recreo ou de cubrir as baixas dos seus compañeiros (moitas veces só por corentenas), e por iso todo funcionou.
Se o próximo curso, no que quizais haxa corentenas puntuais cando non confinamento xeral, non hai profesores suficientes, a educación galega verase afectada: atenderase menos aos alumnos con necesidades de apoio educativo (NEE ou NEAE), desaparecerá toda optatividad na secundaria, pasarán á historia os programas de excelencia , como o StemBach, as prácticas de laboratorio e a coordinación dos docentes en programas diversos.
Por iso, Anpas Galegas recomenda a cada centro e as súas familias que se sigan mobilizando durante o verán, para que a consellería reverta os recortes, «como xa ten feito», con exemplos como o IES de Rodeira, que perdía 6 profesores e tras as protestas só perde 1, ou o de Meira, que pasou de 4 a 1, ou o CEIP de Caión, cuxa terceira unidade de primaria non se pecha... «Recomendamos que as mobilizacións —di Lacaci— se fagan en cada un dos centros, porque teñen maior controlo do que significan», pero lembrando que «detrás de agosto chega setembro».
Haberá todos os profesores necesarios
Mentres tanto, no Parlamento de Galici, o conselleiro de Educación, Román Rodríguez, dicía que a Xunta porá para o curso 2021-2022 a » «todos aqueles profesoresque sexan «necesarios» para cumprir cos protocolos sanitarios e garantir a calidade educativa. Rodríguez lembra que o ano pasado «fíxose un esforzo extraordinario», e aínda que entende as peticións dos sindicatos, apunta que «cando se tende a unha situación máis ordinaria, realmente hai que ir axustándolos [os esforzos]».
