Co sétimo chamamento da CIUG, só quedan unhas vinte carreiras sen pechar en Galicia

Quince novas carreiras universitarias pecharon as súas portas a máis alumnos, e apenas quedan xa vinte graos con posibilidade de praza. O chamamento realizado pola CIUG este martes deixa poucas opcións para as dúas últimas convocatorias previstas: o 6 (este venres) e o 11, mércores.

Da rama de ciencias seguen sen pechar varias enxeñerías en Lugo (Agrícola, Civil, de Procesos Químicos Industriais e Forestal e do Medio Natural) e Paisaxe; na Coruña están Máquinas Navais e as vinculadas a Camiños (Obras Públicas e Tecnoloxías da Enxeñaría Civil); en Ferrol tres enxeñerías (Eléctrica, Tecnoloxías Industriais e Naval e Oceánica); en Ourense son Ciencias Ambientais e Enxeñaría Agraria; en Pontevedra a Enxeñaría Forestal e no campus de Vigo as enxeñerías de Enerxía, Tecnoloxías da Telecomunicación (en castelán/galego e en inglés), Recursos Mineiros e Enerxéticos e Tecnoloxías Industriais en inglés. En Santiago non quedaba xa ningún grao desta rama aberto.

O outro gran grupo son as carreiras de sociais : Xeografía en Santiago; Relacións Laborais en Lugo e Ferrol; ADE e Turismo (coa súa simultaneidade con Xeografía) en Ourense; Dirección e Xestión Pública en Pontevedra; e ADE (a de docencia privada en Ieside) e Comercio en Vigo. Na Coruña pecharon desta vez as catro que quedaban pendentes.

Finalmente, de humanidades quedan poucas titulacións sen pechar: Filoloxía Clásica, Lingua e Literatura Inglesas e Lingua e Literatura Modernas en Santiago; a nova Xestión Cultural en Lugo; dúas das lingüísticas da Coruña (Inglés e Galego-Portugués); Xestión Dixital da Información e Documentación en Ferrol; e dous títulos filológicos de Vigo (a nova Filoloxía Aplicada e Tradución Galego-Inglés).

---

---

---