Galicia aposta pola preferencia de máster entre os interinos e deseña formación urxente aos que non a teñan
EDUCACIÓN
A Conferencia de Decanos de Educación cualifica a decisión de contratar a non titulados como «unha agresión directa á profesión docente»
21 oct 2020 . Actualizado ás 18:11 h.Galicia podería esquivar a polémica xerada pola decisión da Conferencia Sectorial de Educación de contratar como profesores a quen non teñan o máster de Profesorado neste curso. O Comité Educativo, creado a semana pasada, reuniuse hoxe de urxencia e decidiu que se Galicia necesita profesores extra, botarase man da lista de substitutos e se esta esgotar, abrirían a opción a profesionais, primeiro aos que teñen o máster do profesorado e só se non quedan inscritos con esta titulación poderíase contratar, de forma excepcional e temporal, a quen non conten con esta formación.
Formación de urxencia
Para garantir unha mínima adecuación destes profesores de urxencia, a consellería porá en marcha a través do Centro Autonómico de Formación e Innovación (CAFI) en colaboración as facultades que hoxe imparten o máster o deseño dunha «formación pedagóxica específica para acceder de xeito puntual á docencia sen máster do Profesorado». Sería «unha preparación de curta duración, para que, de ser preciso contratar persoas sen máster do Profesorado, estas conten cunha capacitación pedagóxica e educativa ad hoc».
O conselleiro, Román Rodríguez, explicou na reunión do comité que «Galicia non ten neste momento problemas para contratar profesorado, dado que os procesos selectivos dos últimos anos e a oferta pública de emprego garanten que hai profesorado ben formado e con coñecementos pedagóxicos». Só pode darse ao longo do curso algún problema en certas especialidades, fundamentalmente da FP -algunhas levan unha década sen abrir as listas para que se apunten interinos- e é para este contexto que se prevé unha formación de mínimos.
Durante a reunión, Rodríguez, que deu conta dos acordos da Conferencia Sectorial, partiu da base de que en calquera caso as persoas con máster do Profesorado terían prioridade sobre as demais: «O Ministerio explicou que, deste xeito, se podería contratar persoas que non conten co máster, sempre que cumpran todos os demais requisitos, e sempre e cando se esgotaran previamente as listaxes de persoas que si teñen esa titulación», di a nota da Xunta.
Acordo tomado en «un chiringuito»
Xa hai voces discordantes na comunidade educativa. Julio Díaz, presidente de ANPE, explicou que este acordo debería tomarse no seo da mesa sectorial: «Lamentamos profundamente o grave desprezo feito á mesa sectorial e ao Consello Escolar de Galicia que os actuais dirixentes da Consellería tratan de marxinar creando entes e chiringuitos que nada teñen que ver cos lexítimos representantes do profesorado elexidos para defender os intereses dos mesmos fronte a unha Administración que os maltrata e vilipendia».
«Agresión directa á profesión docente»
Os que si están especialmente molestos coa decisión tomada onte son os decanos de Educación. A entidade que os acolle -a Conferencia de Decanas e Decanos de Educación, que preside Carmen Fernández Morante, decana na USC- publicou un comunicado no que «manifesta o seu profundo rexeitamento e perplexidade ante o anuncio realizado polo Ministerio de Educación e Formación Profesional que formaliza a contratación extraordinaria como funcionarios interinos docentes de persoas que non contan coa titulación habilitante esixida por Lei».
Para os decanos, «o anuncio supón unha agresión directa á profesión docente», especialmente ás universidades e aos titulados e estudantes do máster.
O grupo que lidera Fernández Morante lembra que «leva tres anos promovendo un conxunto de medidas para mellorar e elevar a formación e consideración social do profesorado mantendo unha interlocución directa e continuada co ministerio, as comunidades autónomas, asociacións de docentes e movementos de renovación pedagóxica». Un proceso que «xerou grandes expectativas na comunidade educativa que non se poden nin se deben frustrar».
115.000 profesores con máster en catro anos
O anterior explica o seu rexeitamento, pero a súa perplexidade xustifícana os propios datos do Ministerio: «Segundo Educabase de xullo do 2020 -din no seu comunicado- cada curso titúlanse da orde de 30.800 novos profesores e profesoras de secundaria. Desde o 2015 ao 2019 tituláronse no noso país 114.799 en todas as comunidades autónomas».
O argumento de que moitas comunidades teñen dificultades para atopar profesores, din os decanos, ten máis que ver con «a falta de previsión e/ou incapacidade de contratación e xestión das listas de substitución» e «non pode resolverse con medidas que devalúan a profesión docente e poñen en risco o dereito fundamental a recibir unha educación segura e de calidade.