Os exames serán de martes a xoves; a tarde do terceiro día resérvase para incidencias como a ocorrida en xuño; e os alumnos deberán confirmar o seu interese en matricularse
29 novs 2019 . Actualizado ás 19:04 h.A Avaliación do Bacharelato para ou Acceso á Universidade (ABAU), a proba que moitos aínda coñecen como selectividade, terá varios cambios importantes na súa próxima convocatoria. Todos teñen un fin, resolver pequenos problemas, ser máis resolutiva e facilitar o proceso de matrícula na universidade aos estudantes galegos.
Novas datas
Adiántase ao martes. Galicia é unha das comunidades que máis tarde realiza a ABAU. Ademais, elixe os últimos días da semana, de mércores a venres, pero hai un prazo tope fixado polo Ministerio de Educación no que todo o proceso debe estar rematado, o 4 de xullo. Isto fai que ata agora se chegase moi xusto, sobre todo no caso dos alumnos que reclaman ou piden dobre corrección. Adiantando un día os prazos son máis sinxelos de cumprir. A convocatoria de xuño será os días 9, 10 e 11, mentres que a de xullo se fará do 7 ao 9 deste mes. Este adianto tamén facilitará que os estudantes que queren ir a unha universidade de fóra de Galicia teñan antes as súas notas definitivas de cara a entrar nunha carreira con límite de prazas.
Terceira tarde habilitada
Para posibles incidencias. A selectividade do pasado mes de xuño viviu un momento complicado, cando ningún dos exames de Filosofía puido utilizarse. A solución foi trasladar a proba da mañá á tarde, pero a gran variedade de exames que se acumulan en dúas xornadas e media fixo recapacitar aos responsables da CIUG. Para que isto non se repita, explica o presidente desta comisión, Iván Area Carracedo, a terceira tarde, a do xoves, resérvase para posibles incidencias. Non haberá programación de exames, pero os alumnos saberán que aínda é período hábil no caso de que xurda un problema.
Reclamacións
Unifícanse os dous procesos. Ata agora se un alumno non estaba satisfeito coa súa nota tiña dúas alternativas, reclamar ou pedir unha segunda corrección. Na práctica, admite o presidente da CIUG, «tingan moitas dúbidas de que facer». De aí a simplificación. A partir da próxima selectividade se un estudante non está de acordo só ten que pedir unha revisión e aplicaránselle os dous procesos. E como será? Primeiro comprobarase se hai algún erro material na corrección, por exemplo que estean mal sumados os puntos, tanto á alza como á baixa. Despois un corrector diferente revisará o exame en canto a contidos. Se a nota que pon este último e a primeira teñen menos de dous puntos de diferenza, farase a media aritmética. Se hai máis diferencia un terceiro corrector revisará o exame e calcularase a media das tres cualificacións. Isto, ademais, axilizará os prazos, outro dos obxectivos da Comisión Interuniversitaria.
Chamamentos máis áxiles
Para facilitar a matrícula. Co fin de que todo o proceso de matrícula resólvase antes e en xullo poidan facerse catro chamamentos, redúcese o tempo destes. En lugar de dous días e medio faranse en só dous días, co fin de facilitar que os estudantes se matriculen antes na carreira que desexan.
Lista de espera
Haberá que confirmar o interese en matricularse nas mesmas titulacións. Os alumnos, tras ter aprobado a ABAU, solicitan a súa inscrición nunha listaxe de carreiras. En función das súas notas van sendo chamados para que se matriculen, pero a partir de agora o estudante debe confirmar —cun simple clic en Internet— que está interesado nas mesmas carreiras. Por que? Medicina é un exemplo. Centos de mozos piden entrar nesta carreira pero tras o primeiro chamamento non se cobren as prazas. Isto débese a que os alumnos solicitan entrar noutras facultades, o que alonga moito o proceso. Con esta confirmación poderá pecharse non só esta titulación, senón outras que dependen dela, como Enfermería.
