A OCDE apraza a publicación de parte dos resultados do Informe PISA de España tras detectar anomalías
EDUCACIÓN
Un número significativo de estudantes contestou máis de vinte preguntas de comprensión lectora en menos de 25 segundos. En Matemáticas e Ciencias si se publicarán os resultados
23 jul 2020 . Actualizado ás 13:25 h.A Organización para a Cooperación e o Desenvolvemento Económico (OCDE) decidiu aprazar a publicación de parte dos resultados españois do Informe PISA, cuxa publicación está prevista para o próximo 3 de decembro, tras detectar anomalías nas respostas dos estudantes na proba de lectura nalgunhas zonas de España.
Nun comunicado, a OCDE explica que está a traballar co Goberno de España para «identificar as causas» do comportamento «anómalo» das respostas á proba de lectura que «non reflicten en nivel real de competencia dos estudantes». Segundo informa Colpisa, os datos de España cumpriron os estándares técnicos de PISA e non se apreciou ningún erro técnico nin manipulación dos mesmos. Ao parecer, o computador (este ano realizouse así a proba) rexistrou que moitos alumnos empregaron menos de 25 segundos para responder as máis de 20 preguntas de comprensión lectora, aplicando ademais certos patróns, como pór si a todas ou ao contrario, a todas non.
Ademais, a OCDE non descarta que as probas de competencias matemática e científica estean tamén afectadas por este «comportamento anómalo», aínda que en menor medida. Os resultados españois destas probas si se publicarán, xunto aos do resto de países que participan no Informe PISA, o 3 de decembro.
Preto de 40.000 alumnos de 1.102 institutos de todas as comunidades españolas participaron o ano pasado nas probas do Informe do Programa Internacional para a Avaliación de Estudantes, coñecido como PISA polas súas siglas en inglés, que desde o ano 2000 avalía as capacidades de estudantes de todo o mundo en lectura, matemáticas e ciencias.
As probas do Informe Pisa están destinadas a alumnos de 15 anos, xusto cando se achegan a rematar a educación obrigatoria, e realízanse desde o ano 2000 cada tres anos. Os resultados das probas deste ano non se fan públicos inmediatamente. Ao contrario, hai que agardar ata o 3 de decembro de 2019 para coñecelos.
