Abanca lanza, xunto a Minsait, un servizo de procura e xestión de axudas Next Generation

Abanca lanzou, en colaboración con Minsait , unha filial de solucións dixitais de Indra, un novo servizo especializado dirixido a facilitar aos seus clientes o acceso e a xestión das axudas correspondentes aos fondos Next Generation EU. O acordo foi subscrito este martes polo director xeral de Mercado de Capitais, Xestión e Distribución de ABANCA, Juan Luis Vargas-Zúñiga, e o director de Estratexia e Innovación de Servizos Financeiros en Minsait, Álvaro de Salas.

O novo servizo, que pretende  impulsar a chegada dos fondos ao tecido produtivo, vai dirixido a empresas, pemes e negocios que busquen axudas públicas. Comprende , por unha banda, a procura de axudas (consulta das posibilidades existentes, localización das que se axustan a un proxecto específico, ou identificación das que aplican a unha determinada empresa) e, por outro, a xestión da solicitude. A fase de procura de axudas realízase a través dunha plataforma online de uso gratuíto desenvolvida por Minsait, que tamén prestará soporte á tramitación, o seguimento e a resolución da solicitude. Os clientes de Abanca poden realizar procuras por palabra crave, tipo de beneficiario (autónomo, empresa, peme), sector económico, tipo de axuda (garantía, préstamo, financiamento, subvención, etc.) e clase de convocatoria (concesión directa ou concorrencia competitiva). É posible restrinxir a procura ás axudas relacionadas cos fondos europeos ou doutro tipo. Unha vez seleccionada a opción que mellor se adapta ás súas preferencias, o cliente pode solicitar información adicional a un asesor especializado de Minsait a través dun formulario web.

A fase da xestión da axuda realízase telefonicamente a través dun contact center que proporciona soporte durante todo o proceso, desde a presentación da solicitude ata a súa resolución. En cada caso analízanse as necesidades particulares do cliente e ponse á súa disposición diferentes opcións de servizo, que van desde unicamente a tramitación da axuda (cun custo fixo por solicitude) ata un asesoramento a medida proporcionado por consultores especializados en axudas públicas (con orzamento personalizado).

«Este acordo achega os fondos Next Generation ao tecido produtivo ofrecendo aos nosos clientes empresas, pemes e negocios un servizo especializado, útil e flexible que lles permite coñecer que axudas existen, identificar as que mellor se adaptan ás súas necesidades, e xestionalas eficazmente co asesoramento de técnicos especializados», explicou o director xeral de Mercado de Capitais, Xestión e Distribución de Abanca, Juan Luis Vargas-Zúñiga.

Pola súa banda, Álvaro de Salas, director de Estratexia e Innovación de Servizos Financeiros en Minsait, destacou «a significativa contribución destes servizos á recuperación do tecido empresarial español, dado que permitirán a empresas, pemes e autónomos axilizar o acceso aos fondos europeos para apostar de xeito decidido por un crecemento dixital e sostible».

Apoio integral ao cliente

Este servizo é un paso máis na batería de accións postas en marcha polo banco para ofrecer aos seus clientes un modelo de apoio integral para aproveitar os fondos europeos de recuperación. Tras a creación da unidade especializada Next Generation Abanca, a entidade participou na constitución de Impulsa Galicia para promover iniciativas empresariais tractoras que incidan na dinamización e transformación da economía, estableceu numerosos contactos con empresas, cámaras de comercio e confederacións de empresarios, e celebrou diferentes xornadas e webinars informativos.

Un aspecto crave neste esforzo é o lanzamento de produtos específicos para o financiamento de proxectos vinculados ás axudas Next Generation, cun amplo catálogo composto por préstamos persoais a tipo fixo e variable, leasing mobiliario fixo e variable, anticipos de subvención e avais bancarios. 

---

---

---