Comprar en páxinas como AliExpress será máis caro a partir do 1 de xullo

O próximo 1 de xullo entra en vigor a nova normativa europea de IVE que cambiará, entre outras cousas, as regras do comercio electrónico cando se trate de compras en países de fóra da Unión Europeo. Isto quere dicir que tendas online como AliExpress resultarán máis caras para o peto do consumidor -que poderían, ademais, ter que facer fronte ao pagamento de taxas adicionais- e a vantaxe competitiva, xa que logo, verase mermada.

Ata agora, os produtos que se compran fóra da UE cuxo valor é inferior a 22 euros, están exentos de IVE. Isto supón na práctica que webs como AliExpress poidan ofrecer bens a moi baixo custo ao non estar gravados con ese imposto. Todo un choio. De feito, AliExpress situouse a cargo de as aplicacións de venda polo miúdo durante o primeiro trimestre deste ano tras acadar o 62,5 % de cota de mercado, superando a Amazon. Pero as regras van cambiar. A partir do 1 de xullo elimínase a exención: todas as importacións deberán liquidar o IVE con independencia do seu valor.

Ademais, o proceso de pagamento de IVE en Europa, sufrirá cambios. A Comisión Europea habilitou un portelo de pagamento único, que leva operativa desde o 1 de xuño. Este réxime, chamado Import One Stop Stop (IOSS) permitirá a liquidación e ingreso do IVE no Estado membro onde a empresa elixa rexistrarse. Así, recadará o imposto cando realice a venda e ingresarao na Unión Europea mensualmente.

Para aqueles vendedores que decidan non inscribirse no IOSS, a parte correspondente ao imposto deberá ser pagada polo cliente antes de recibir o artigo. Isto implica que serán os operadores postais e as empresas de paquetería os encargados de cobrar ao cliente o IVE, e ademais, taxas adicionais pola súa tramitación. No caso das compras superiores a 150 euros, han de facer fronte, ademais, ao pagamento de aranceis especiais, aínda que este suposto xa estaba incluído na norma e non sofre cambios a partir do próximo mes.

A empresa de paquetería DHL Express informa de que para que os usuarios poidan liquidar os impostos, habilitaron un sistema de pagamento online. «Os compradores recibirán un SMS ou un mail xusto cando o envío sae de orixe co importe a pagar» explican desde a compaña, que tivo que ampliar persoal para facer fronte ás novidades da normativa. 

Os expertos agardan, con todo, que estes casos sexan unha minoría. O normal é que as grandes plataformas de venda elixan declarar o IVE a través do portelo único para non prexudicar a experiencia do usuario. Ao utilizar o IOSS, o imposto pagarase como parte do prezo de compra de calquera artigo, evitando que os clientes se enfronten a custos e atrasos inesperados no momento da entrega.

Evasión fiscal

«A directiva europea ten como obxectivo que o IVE se pague en destino. É dicir, no país no que se consumen os bens ou se prestan os servizos» explica Lois Permuy, asociado do despacho Cremades & Calvo-Sotelo. Para o experto: «A exención de menos de 22 euros supuña un disparate, un sistema inxusto». Ademais co portelo único «elimínanse trámites burocráticos e mellórase o control de mercancías» . O certo é que con respecto ao comercio electrónico o Executivo europeo pretende así evitar a evasión fiscal por parte das empresas estranxeiras, e fomentar que os cidadáns europeos compren produtos fabricados na UE.

---

---

---