Manterán un recorte do 5 % polo imposto sobre a renda xermano, aínda que poderán deducirse a contía na súa declaración española
03 jun 2021 . Actualizado ás 11:43 h.Pau para máis de 10.000 galegos retornados de Alemaña que cobran unha pensión xermana polos seus anos de traballo alí. O Tribunal Federal de Finanzas do país desestimou a demanda por dobre imposición presentada contra a decisión de aplicar unha retención do 5 % sobre as prestacións por xubilación, que antes dese ano estaban exentas no imposto da renda.
Isto implica que a pensión que reciben de Alemaña seguirá suxeita a ese desconto do 5 %, que logo poderán deducir, iso si, na súa declaración da renda española. Así seguirá polo menos ata o 2030, cando a porcentaxe de retención incrementarase ao 10 %, tal e como explica o secretario provincial de Emigración do PSOE de Ourense, Luis Gulín.
Entende o tribunal que non se produce unha dobre imposición (con cotizacións sociais durante a vida laboral do traballador e cunha retención logo unha vez que percibe a pensión) posto que as cotas de afiliación son deducibles do imposto da renda cando se abonan.
Con todo, a sentenza establece que aínda que genéricamente non exista dobre imposición, hai que analizar cada caso individual, para comprobar que o importe percibido en pensións unha vez aplicadas as retencións é polo menos tan alto como o cotizado (e non desgravado) na vida laboral. E é que o tribunal considera que os futuros xubilados poden ser máis vulnerables a esa dobre imposición, do mesmo xeito que os traballadores autónomos se verán afectados en maior medida que os asalariados ou os homes que as mulleres, pola maior esperanza de vida destas.