Naturgy recoloca en Galicia ao 50 % do persoal do centro de control de rede
ECONOMÍA
O grupo leva meses negociando cos sindicatos as condicións da marcha do persoal
18 abr 2021 . Actualizado ás 05:00 h.Tras varios meses de protestas polo traslado a Madrid do centro de operación de rede (COR) de Naturgy de Galicia, situado na Coruña, e da maior parte dos seus traballadores, a empresa decidiu mellorar a súa oferta aos sindicatos para acadar un acordo sobre o destino dos 28 empregados. Agora ofrece que o 50 % deles sexan recolocados noutros postos da compaña en Galicia. Fontes da empresa explicaron que pactaran xa ese punto con dous dos sindicatos e que varios empregados se adheriron voluntariamente. As negociacións para chegar a un acordo global continúan abertas porque «hai unha vontade seria e decidida por parte da compaña para acadar unha solución consensuada», subliñaron desde Naturgy.
O persoal inicial do COR era de 28 operarios, pero catro ocuparon outras vacantes e un deixou a empresa. Así que quedan 23, que se vían obrigados a deixar Galicia para trasladarse ao COR de Madrid. O grupo leva meses negociando cos sindicatos as condicións desa marcha. De feito, hai unhas semanas produciuse un principio de acordo, que se frustrou.
O COR é o centro desde o que se xestiona a rede de distribución eléctrica de UFD (Naturgy) en Galicia. Desde el, por exemplo, actúase ante os apagamentos ou avarías. O grupo decidiu centralizar en Madrid esas tarefas a partir de setembro. A compaña reitera que é froito dunha reorganización para non duplicar servizos e que mantén un firme compromiso por Galicia, unha comunidade que considera estratéxica. leva o COR, pero desde aquí coordina todas as centrais hidráulicas do país, por exemplo. Desde o 2006 investiu só en redes 584 millóns.