Rodrigo Fernández de Castro: «En Galicia temos suficiente mercado para os nosos negocios»
ECONOMÍA
Do legado de Amador de Castro nace Figrupo, con negocios distintos pero coa comunidade como nexo común
08 dic 2019 . Actualizado ás 19:35 h.Tras máis de tres décadas liderando un grupo de empresas con renome en Galicia, Amador de Castro decidía dar paso á seguinte xeración, un equipo de persoas que leva máis de quince anos no grupo e que recollen as sementes plantadas polo fundador, coa idea de seguir consolidándoas e reforzándoas. De aí nace o grupo Fomento de Iniciativas, Figrupo, unha sociedade composta por cinco «patas» completamente diferentes pero que comparten a mesma filosofía. Algunhas, como Abeconsa, forman xa parte da historia empresarial galega. Outras, como as residencias de maiores Raiola, chegan para reivindicar un lugar. Á fronte do grupo atópase Rodrigo Fernández de Castro.
-Que brazos conforman Figrupo e en que consisten?
-Traballamos en sectores como a construción inmobiliaria a través de Abeconsa, pasando polo sector náutico, o tratamento de vehículos fóra de uso e, ultimamente, dous sectores novos para nós que son o das gasolineiras independentes e un novo proxecto que iniciamos hai pouco de residencias de maiores.
-Por que a decisión de optar por sectores tan diferentes?
-Entendemos que hai un nexo común entre todos, que é o modelo de xestión e, principalmente, a vinculación con Galicia. Somos un grupo principalmente galego.
-Unha das últimas apostas son as residencias de maiores, por que este negocio?
-As residencias son un sector que en todos os foros se cualifica como de aposta. Pero nós entramos porque entendemos que o noso modelo de residencias vai achegar algo máis. Non entramos para facer residencias como se fan hoxe en día, que son moitas delas fantásticas. Queremos achegar un modelo diferente que vén do norte de Europa, un proxecto no que nos metemos máis polo fin e pola satisfacción do modelo que polos resultados que poida dar.
-En que se diferencia este modelo do tradicional?
-Converte á persoa no centro da residencia. A residencia é a que se ten que adaptar á persoa, e non ao revés. Personalízanse desde os horarios das comidas ata as actividades. Entende que para facilitar o benestar das persoas hai que darlles autonomía e reforzar a súa dignidade. E todo iso se consegue dando continuidade aos procesos que as persoas veñen desenvolvendo na súa casa. A idea é que cando entren nunha residencia inténtense manter os seus hábitos e os seus costumes, e facilitarlles o día a día. Require moito máis esforzo de adaptación, pero a cambio o benestar dos residentes increméntase.
-Outra das novidades son as gasolineiras...
-Levamos anos traballando neste sector porque é un proceso que administrativamente é moi lento. Abrimos a primeira en Cee e temos unha parcela en Santiago para a que xa pedimos licenza e que agardamos que sexa a segunda gasolineira na nosa pequena rede.
-Darán o salto coas gasolineiras ao resto de España?
-Non. Entendemos que en Galicia temos suficiente mercado para case todos os nosos negocios. Fóra de Abeconsa, que tamén traballa en Madrid, un mercado moi grande no que sempre fomos ben recibidos.
-No que respecta a Abeconsa, a idea é manter a liña de negocio destes anos?
-Si. Desde fai dous ou tres anos Abeconsa pegou un salto importante. Realizouse un investimento moi forte na compra de activos e a liña de promoción reforzouse. Agora mesmo dispón de soares na Coruña, en Santiago, en Vigo e en Ferrol para desenvolver promocións. A promoción que temos é de tamaño medio con prezos que sempre intentamos que sexan axustados dentro do que é o mercado e cunha vocación de calidade e garantía moi alta. A idea é que pasen cinco ou dez anos e as vivendas de Abeconsa teñan un valor no mercado.
-Construción, residencias... E tamén tratamento de coches, en que consiste este negocio?
-Búscase un punto engadido ao despezamento. Iniciouse como tratamento puro de vehículos, cunha porcentaxe de tratamento dos máis altos. E a día de hoxe reorientouse un pouco ao mercado de pezas de segunda man. Pódense comprar a través dunha aplicación ou mesmo por eBay e outros portais. Os vehículos desmóntanse, clasifícanse os compoñentes e existe un almacén onde todas as pezas están indexadas e calquera desde o seu teléfono móbil pode comprar o retrovisor do coche ou o faro traseiro.
