Poderían instalarse nun edificio propiedade do empresario situado nos Cantóns
08 novs 2019 . Actualizado ás 11:00 h.O equipo máis próximo ao principal accionista de Inditex , Amancio Ortega, está estudando a posibilidade de trasladar tanto Pontegadea, a sociedade patrimonial do empresario, como a fundación que leva o seu nome -situadas ambas actualmente no polígono de Sabón, en Arteixo -, a un novo emprazamento.
O lugar escollido sería un histórico edificio situado no Cantón Grande 4, un inmoble que xa é propiedade da sociedade de investimento do empresario e que ten unha situación privilexiada, xa que se atopa en pleno centro da cidade herculina.
De feito, o edificio está situado a menos dun quilómetro da vivenda na que residen tanto Amancio Ortega e Flora Pérez como a súa filla, Marta Ortega.
Con todo, antes de levar a cabo a mudanza haberá que rescindir o contrato dalgúns dos inquilinos. E é que no inmoble que podería converterse no futuro en sede de Pontegadea e da Fundación Amancio Ortega quedan aínda algúns arrendatarios. O máis importante é o Banco Santander, que ten instaladas nestas oficinas a súa sede da cidade.
E non son os únicos. Porque tamén teñen os seus despachos neste emprazamento outras empresas comou o bufete de avogados Garrigues ou a desenvolvedora de software Accenture. Algúns dos inquilinos xa fixeron as maletas e hai plantas do inmoble que xa se atopan baleiras. Outros seguirán os seus pasos nos próximos meses.
Máis espazo en Sabón
Na actualidade, tanto Pontegadea como a Fundación Amancio Ortega teñen as súas oficinas no polígono de Sabón, en Arteixo, na sede central do grupo téxtil.
Se finalmente se confirma o movemento, os edificios que ata agora albergaban estas dúas entidades quedarían liberados, permitindo así ao xigante téxtil galego aproveitar estas edificacións para albergar outros departamentos.
Inditex, Pontegadea e a Fundación Amancio Ortega non serán os únicos que noten o traslado. Porque, como é de agardar, producirase un movemento no mercado inmobiliario local. E é que as empresas que ata agora están situadas no edificio dos Cantóns, unha das zonas máis emblemáticas (e cotizadas) da Coruña, terán que buscar unha nova morada.