A térmica precisa doutras medidas regulatorias para volver ser competitiva
11 sep 2019 . Actualizado ás 13:45 h.A térmica pontesa leva case cinco meses paralizada, pero Endesa dista moito de quedarse parada ante esa situación. Desde que a escalada dos prezos de adquisición dos dereitos de emisión de CO2 expulsou ás plantas de carbón do sistema de xeración, a compaña eléctrica non deixou de probar novas opcións para intentar rebaixar os custos de produción e poder recuperar a actividade na terminal. Así, nestes meses utilizou, como combustibles complementarios ao mineral, distintos residuos vexetais —entre eles ósos de oliva, cascas de cereais e pellets de biomasa— e tamén lodos procedentes de depuradoras.
A empresa, que elude entrar no detalle da materia prima utilizada, si confirma, no entanto, que está a levar a cabo todo tipo de estudos para, a través de combustibles complementarios, poder mellorar a sustentabilidade da central. No entanto, subliña que, tanto a regulación enerxética actual —con impostos como o céntimo verde, que gravan as centrais como as de carbón— e as propias circunstancias do mercado, no que o maior peso de xeración asúmeno as fontes renovables, aluman un futuro moi difícil.
Dito doutro xeito, Endesa —que executa desde hai case dous anos un investimento de 217 millóns de euros para que a térmica pontesa sexa menos contaminante— considera que, aínda abaratando os custos para producir, precisará do acompañamento doutras medidas.
Precisamente á porta do Goberno, en concreto do Ministerio para a Transición Ecolóxica, chamaron este martes alcaldes e representantes de varios concellos da comarca, xunto cos transportistas que se ocupan de trasladar o carbón desde o porto exterior ferrolán ata a vila mineira, capitaneados polo rexedor pontés, Valentín González. Foron a Madrid a reclamar solucións para unha das principais industrias enerxéticas de Galicia, da que dependen máis de 700 postos de traballo directos.
O alcalde das Pontes explicou ao termo do encontro que o Goberno se comprometeu a convocar antes de que finalice o mes a reunión da comisión na que estará presente Endesa, para escoitar a súa visión sobre as causas que levaron á exclusión da planta do sistema e sobre as súas peticións para liquidar esta crise. González Formoso considera que a eléctrica debe acudir á reunión cos resultados das diferentes probas que está a desenvolver para poder recuperar a actividade na central, e clarificar ademais o que necesita para volver operar.
Sen despedimentos nas auxiliares
Ademais, pediu aos representantes gobernamentais que reclamen a Endesa que manteña todo o emprego auxiliar a expensas de clarificar esta situación. Entre os asistentes á reunión atopábanse os alcaldes de San Sadurniño, Narón e A Capela, ademais de representantes doutros municipios, como Ferrol, que piden que se tomen medidas urxentes. Mentres, en Ferrol , Vilalba e As Pontes continúan os peches dos camioneiros, afogados pola falta de ingresos e actividade.
Manuel Bouza, portavoz dos transportistas, asegurou que, aínda que non regresan de Madrid cunha solución inmediata, consideran positivo o respaldo mostrado polos alcaldes. No entanto, anunciou que non poden agardar moito máis e anunciou que os peches serán indefinidos.
