Madrid quere coñecer o proxecto do investidor interesado en comprar as plantas de Alcoa

O Ministerio de Industria convocou para o martes ao fondo suízo Parter Capital e aos representantes dos gobernos autonómicos de Galicia e Asturias para «coñecer o proxecto industrial» que ofrece a compaña para facerse coas plantas de Alcoa en Avilés e A Coruña.

Segundo informou a Delegación do Goberno en Galicia, á vista de como avanzan as negociacións entre Parter Capital e Alcoa, o Ministerio realizou a convocatoria, para coñecer o proxecto industrial que ofrece a empresa e que xa foi presentado aos comités de empresa o venres. O encontro terá lugar este martes ás 15,00 horas, na sede do Ministerio de Industria.

Alcoa negocia co fondo suízo Parter Capital a venda das plantas da Coruña e Avilés, tras baixar do proceso de compra o investidor alemán Quantum Capital Partners, ao entender que a empresa non cumpría as garantías financeiras. Así o informaron desde a comisión de seguimento do ERE a través dun comunicado, onde explicaron que na reunión celebrada este venres confirmouse oficialmente á representación sindical que este investidor -interesado só na planta asturiana- non seguiría.

---

---