A caída de vendas sitúa o parque galego de vehículos entre os máis vellos de España
17 abr 2019 . Actualizado ás 05:00 h.As vendas de coches en Galicia levan xa sete meses co freo posto. O balance do primeiro trimestre guindou un descenso das matriculacións do 12 % respecto ao ano pasado, ata as 9.901 unidades, mentres o mercado de segunda man triplicou esa cifra (27.744 coches).
Véñeno avisando desde hai tempo as estatísticas de Tráfico e as patronais do sector (fabricantes e vendedores): Galicia ten un parque de vehículos preocupantemente envellecido. Pero a situación do mercado está empeorando as cousas, segundo revela un novo informe elaborado por Faconauto, a asociación dos concesionarios, que revela que o 35 % dos automóbiles que están dados de alta na comunidade galega saíron de fábrica fai máis de tres lustros, en concreto hai 16 anos ou máis». A idade media dos coches que hai matriculados en Galicia sitúase xa nos 12,18 anos, das máis elevadas de España, só superada por Castela e León, Ceuta e Melilla, segundo datos da consultora MSI para a patronal dos concesionarios.
«A media galega segue mostrando a necesidade de rexuvenecer o parque para avanzar cara a unha mobilidade descarbonizada, para mellorar a seguridade viaria e para evitar os episodios puntuais de contaminación que sofren as grandes cidades», advirten desde a patronal dos concesionarios.
Obxectivo: rexuvenecer
Faconauto prognostica que, lonxe de rexuvenecer, o parque galego de vehículos será cada vez máis vello nos próximos anos, o mesmo que ocorrerá no conxunto de España se non se articulan medidas de choque que o saneen. Segundo as súas estimacións, «no 2025 o 43,4 % dos coches en circulación terán 16 anos ou máis» e a idade media rozaría xa os 14 anos.
Tal e como están as cousas, a patronal aventura que a renovación non se vai a producir nos próximos anos, porque o parón de vendas dos últimos sete meses acentuou o envellecemento. «Os coches dados de baixa son menos que os que se matriculan», advirte Faconauto.
Para concesionarios e fabricantes, a única vía para endereitar o mercado é incentivalo: «Só cun plan de renovación intensivo, ambicioso no seu orzamento e que se estendese nos próximos cinco anos, poderíase deter este envellecemento, xa que se lograría que no 2025 o parque apenas crecese ata os 28 millóns de unidades, o que daría como resultado unha idade media do parque de 11,8 anos», aseguran as patronais.