Publicada a lista de domingos e festivos que poderán abrir as grandes superficies
ECONOMÍA
A Administración galega fixo pública onte no Diario Oficial de Galicia (DOG) a lista dos domingos e festivos nos que, ao longo do 2019, poderán abrir as grandes cadeas e superficies comerciais, que son as que non gozan de plena liberdade horaria, segundo a normativa galega. Trátase dunhas datas que se acordan despois dun proceso de consulta previo coas diferentes organizacións do sector, o Consello Galego de Consumidores e o Consello Galego de Cámaras de Comercio.
Tal e como establece o marco regulatorio, os días de apertura son dez cada ano. E ao longo do 2019 distribuiranse do seguinte modo: o 13 de xaneiro, que é precisamente o primeiro domingo despois da data tradicional de inicio das rebaixas de inverno; o 18 de abril, Xoves Santo; o 30 de xuño, domingo previo á data habitual de comezo das rebaixas de verán; o sábado 12 de outubro, Día da Hispanidade; o venres 1 de novembro, Todos os Santos; e todos os domingos de decembro, que se corresponden cos días 1, 8, 15, 22 e 29.
Solicitude a nivel local
A Xunta informou onte de que calquera concello que o estime oportuno poderá solicitar ata o próximo 15 de novembro a modificación de ata dúas datas para o seu termo municipal, ben sexa para adaptalo aos festivos locais, ben sexa para atender calquera outra circunstancia que poida xustificar.
Desde a Consellería de Economía, que é o departamento competente en asuntos de comercio, lembran que esta lista de domingos e de festivos non é de aplicación directa para o pequeno comercio.
A normativa autonómica en vigor establece que, con carácter xeral, poden decidir libremente o seu horario e os días de apertura os establecementos de ata 300 metros cadrados, coa excepción dos que non teñan a consideración de pequena e mediana empresa (peme).