Inclúe o 19 de marzo, Día do Pai, como festivo autonómico
20 oct 2018 . Actualizado ás 13:28 h.O calendario do 2019 permitirá á Xunta mover dúas datas para manter como festivo o venres 17 de maio, Día das Letras Galegas, como xa é habitual. E, do mesmo xeito que ocorreu noutras ocasións, o 19 de marzo, Día do Pai, que cae en martes. O Goberno autonómico exerce así a potestade para mover dous festivos tradicionais que o próximo ano coinciden en domingo: o día de Reis (6 de xaneiro) e o da Inmaculada (8 de decembro). A estas dúas datas sumarase, tras o visto e prace do Consello Galego de Relacións Laborais, o 25 de xullo como Día Nacional de Galicia, un xoves; e tamén o Xoves Santo, que será o 18 de abril.
A normativa establece catorce días de descanso: doce marcados polo Estado e dous elixidos polos concellos, que deberán aprobalos nos seus respectivos plenos municipais. Tal e como publica o BOE, oito destes festivos son obrigatorios, e só intercambiables se caen en domingo. No 2019 son: o 1 de xaneiro (martes); Venres Santo (19 de abril); o Día do Traballo (1 de maio, mércores); a Asunción (15 de agosto, xoves); Día da Hispanidade (12 de outubro, sábado); Todos os Santos (1 de novembro, venres); a Constitución (6 de decembro, venres); e Nadal (25 de decembro, mércores).
Posibles pontes
Ningún dos festivos do próximo ano coincide en luns, e só un cae en sábado. Os martes, xoves e venres, con tres respectivamente, son os que se presentan como susceptibles de encaixar como pontes laborais, ata oito, coa consecuente xustificación das xornadas que quedan entre a fin de semana e a xornada de descanso oficial.
O presidente Feijoo xustificou a oportunidade de escoller o día de San José polo seu interese económico e a repercusión no comercio de proximidade pola actividade que xera o tamén chamado Día do Pai, á marxe da oportunidade social de reunión das familias. No caso do 25 de Xullo, o festivo polo Día de Galicia estableceuse nun decreto de 1978; e o Día das Letras Galegas (17 de maio) é o que adoita xerar máis dificultades de encaixe, e estableceuse polo seu carácter cultural e lingüístico para conmemorar o libro de Rosalía de Castro Cantares galegos. Neste 2018, ao non existir a posibilidade de cambio con outra data, o Goberno galego decidiu que tamén fose festivo, acadando así os 15 días ao ano, aínda que esta excepción obrigaba a traballadores e empresas a articular unha fórmula para recuperar as horas desa xornada.