As perdas do Popular no 2017 engordan en case 1.400 millóns máis, ata os 13.560
ECONOMÍA
O buraco é máis do triplo que o do 2016, segundo o informe remitido polo Santander á CNMV
17 feb 2018 . Actualizado ás 08:20 h.As perdas históricas coas que o Banco Popular pechou o 2016 (3.700 millóns de euros) palidecen comparadas coas do pasado ano, xa que o buraco co que finalizou 2017, segundo o informe financeiro anual que o Santander enviou este venres á Comisión Nacional del Mercado de Valores (CNMV), case o multiplica por catro. O citado informe recolle que a entidade, adquirida nunha poxa exprés polo Santander na madrugada do 7 de xuño, perdeu 13.560 millóns, 1.342 máis que as últimas estimacións realizadas en setembro.
Naquel momento, o Popular -o segundo banco de Galicia tras a adquisición do Pastor, marca coa que opera na comunidade- acumulaba unhas perdas de 12.218 millóns de euros no primeiro semestre do ano, debidas principalmente ao lastre do ladrillo, en forma de abultadísimos saneamentos (entre eles, se provisionaron 7.200 millóns para cubrir a deterioración de activos e créditos).
A memoria financeira anual do Santander, que agora eleva a 13.650 millóns os números vermellos definitivos, tamén recolle que o que foi o sexto banco do país e o máis eficiente de Europa tivo unhas perdas de 37 millóns de euros tras a compra por parte do cántabro, debido aos 300 millóns que supuxo o custo do expediente de regulación de emprego (ERE) derivado da integración. Excluíndoo, o Popular tería gañado 263 millóns desde a súa venda e ata o peche do ano.
As elevadas perdas da entidade no 2017 son as segundas máis avultadas da historia nunha empresa española, só superadas polos 19.056 millóns de Bankia no 2012.