Supoñen o 93 % dos negocios galegos e soportan case o 40 % dos custos de persoal, aínda que só ingresan un de cada cinco euros facturados na comunidade
29 novs 2017 . Actualizado ás 10:41 h.É unha das materias pendentes da economía española, como advirten desde organismos internacionais como o FMI e asumen no Goberno. O escaso tamaño das empresas é, en palabras do ministro Luis de Guindos, «unha das principais rémoras» para o crecemento, xa que «limita a internacionalización e a presenza en mercados estranxeiros» e dificulta a súa supervivencia en tempos de crise. Pero a realidade é teimuda e, a pesar das promesas para remover todas as trabas, administrativas ou fiscais, que limitan o crecemento dos negocios, de momento España é un país de microempresas. E Galicia non é a excepción.
O inmobiliario e a hostalería son os sectores con máis empresas de tamaño reducido Un estudo sobre o tecido empresarial galego publicado recentemente polo Instituto Galego de Estatística revela que case o 93 % das 49.294 sociedades mercantís que existían na comunidade ao peche do 2015 (o último ano analizado) están catalogadas como micro, xa que a súa facturación non acada os dous millóns de euros anuais. Son, en concreto, 45.767 os negocios que non superan este limiar de ingresos, a cifra máis alta desde o ano 2010. Outras 2.794 teñen a consideración de pequenas empresas, xa que a cifra de negocio sitúase entre os dous e os dez millóns anuais, e só 733 teñen catalóganse como medianas ou grandes, ao superar ese último listón. A pesar de que aínda son unha mancha nun océano, a recuperación nótase e o ritmo de crecemento é máis alto nos segmentos de máis facturación: xa que fronte ao repunte do 4,4 % nas microempresas, as pequenas creceron o ano pasado un 9 % e as medianas e grandes, preto do 10 %.
Con todo, o peso da microempresa non é homoxéneo e depende en gran medida do sector de actividade. Así, a maior proporción de negocios de tamaño moi reducido dáse no sector inmobiliario (onde o 99 % das sociedades non chegan a eses dous millóns de facturación), a hostalería e as actividades profesionais, científicas ou técnicas (por amais do 98 %). A menor proporción dáse no sector do material de transporte , onde só supoñen o 64 % das empresas en activo.
Tras exercicios de números vermellos, o beneficio empresarial duplicouse nun ano Un dominio en número que mingua, e moito, cando se miden outras variables económicas. Porque aínda que son un 93 % dos negocios, as microempresas galegas apenas ingresan un de cada cinco euros da facturación total das sociedades da comunidade, que o ano do estudo ascendeu a 57.828 millóns de euros. Desta cantidade, a parte do león (35.134, máis do 60 %) repartíronlla as 733 grandes e medianas compañas (que só representan o 1,4 % do total), a razón de case 48 millóns de media cada unha -unha cifra contaminada polo efecto Inditex, que infla estas estatísticas-. As microempresas, pola súa banda, ingresaron 11.168 millóns, cunha media sensiblemente inferior: 226.559 euros ao ano.
A pesar da súa escasa participación na facturación e nos beneficios (que é aínda máis reducida, só o 7,5 % do total), estas miniempresas seguen sendo un sostén fundamental para o emprego na comunidade. A proba está en que soportan case un 40 % dos gastos de persoal, unha proporción similar á das medianas e grandes compañas, que facturan máis do triplo que as micro.
Os efectos da recuperación
O estudo do INE, referido ao 2015, mostra os primeiros efectos da recuperación no tecido empresarial galego. E é que ese ano a facturación volveu subir con forza, case un 5 %, unha cifra que se superou nas pequenas empresas e nas micro, cuxos ingresos creceron un punto máis.
Tras anos de recortes de persoal, a reactivación traduciuse tamén nun repunte da contratación e, con ela, dos gastos de persoal, que se incrementaron un 4,3 %. Pero sin duda o mellor termómetro de que a crise ía quedando atrás está no beneficio empresarial, que creceu un 132 % en só un ano.