A maior oferta de locais en Vigo e A Coruña rebaixa os prezos do alugueiro
ECONOMÍA
O metro cadrado nas cidades galegas chega a oscilar entre 1,71 e 38 euros ao mes
14 novs 2017 . Actualizado ás 05:00 h.Nas sete grandes cidades de Galicia hai actualmente 3.245 locais comerciais dispoñibles para alugar, case medio centenar máis que no mes de abril, segundo un estudo elaborado pola Federación Galega de Empresas Inmobiliarias (Fegein) cos datos solicitados entre os seus asociados. O incremento da oferta concéntrase nas dúas áreas metropolitanas máis poboadas da comunidade, Vigo e A Coruña, onde nestes seis meses incorporáronse á bolsa de arrendamento 150 e 90 inmobles, respectivamente.
Esa maior dispoñibilidade de locais tradúcese nun descenso dos prezos, que caen con forza especialmente na comarca herculina, que xa non ten os alugueiros máis caros de Galicia. Dos 11 euros ao mes que custaba de media o metro cadrado en abril pasouse agora a 9,56, unha rebaixa do 13 %.
A redución do custo dos arrendamentos é menos brusca na zona de Vigo, onde o metro cadrado baixou de 9 a 8,5 euros de media. Aínda que tamén á baixa respecto da primavera, Santiago sitúase agora como a cidade máis cara para alugar un local comercial, con 10 euros por metro cadrado. E iso a pesar de que hai moitos menos locais dispoñibles na capital e a súa área metropolitana: pasan de 400 en abril aos apenas 225 actuais, case a metade.
O outro extremo atópase en Ferrol, a comarca cos alugueiros comerciais máis baratos de Galicia e onde os locais seguen depreciándose. O metro cadrado págase actualmente a 4,5 euros ao mes, un 10 % menos que seis meses antes. En Pontevedra, Ourense e Lugo a tendencia é a contraria. Sobe o custo do alugueiro deste tipo de inmobles, pero tamén é certo que en todas esas áreas metropolitanas, salvo na ourensá, redúcese a oferta de inmobles.
Benito Iglesias , presidente de Fegein, entende que a oferta é «máis que suficiente» para a demanda que existe actualmente na comunidade, aínda que insiste en que está moi descompensada territorialmente, xa que o 80 % dos locais dispoñibles para montar un negocio concéntranse nestas sete comarcas urbanas. Unha asimetría que, advirte a patronal das inmobiliarias, é a evidencia de que existe unha Galicia de dúas velocidades pola debilidade económica dos municipios menos poboados e o escaso atractivo para fixar actividades económicas e poboación, que creen que só se podería compensar con incentivos fiscais.
Pero tamén dentro das cidades hai diferenzas, e non pequenas, como mostra o estudo. O metro cadrado dun local na zona de Ferrol Vello (a máis barata das urbes galegas) págase a 1,71 euros ao mes, fronte aos 38 que se piden nas rúas ourensás de Santo Domingo e Paseo, o sitio onde é máis rendible ter un local para alugar. Sen necesidade de cambiar de cidade, os prezos dun baixo no centro poden chegar a multiplicar case por 20 os dun inmoble nun barrio. Esa é a diferenza entre alugar na milla de ouro ourensá ou nas zonas de Polvoreira ou Vistahermosa.
A compravenda de vivendas disparouse un 17 % en Galicia en setembro
Aínda que con máis altibaixos que noutras zonas de España, o mercado inmobiliario parece ter consolidado a senda de crecemento en Galicia. En setembro rexistráronse na comunidade 1.322 compravendas de vivendas, un 17,3 % máis que no mesmo mes do ano anterior, segundo os datos publicados onte polo INE. O repunte é seis puntos superior ao experimentado no conxunto do país, onde cambiaron de man 38.610 inmobles.
O forte repunte experimentado en agosto e setembro redondeou o balance do conxunto do ano: nos nove primeiros meses vendéronse en Galicia 10.940 vivendas, un 6,3 % máis que nese período do 2016. O crecemento aséntase no tirón do mercado de pisos e casas de segunda man, que repunta máis dun 12 % e concentra tres de cada catro operacións.