Galicia, entre as comunidades nas que máis crecerá o emprego temporal por Nadal
ECONOMÍA
Randstad calcula que respecto ao 2016-17 aumentará un 13 %
24 oct 2017 . Actualizado ás 05:00 h.A campaña de Nadal xerará máis de 387.000 contratos de traballo en España, un 11,1 % máis que no mesmo período de 2016, segundo a previsión da empresa de recursos humanos Randstad, que sitúa a Galicia como unha das tres comunidades con maior crecemento destes empregos de tempada. As boas perspectivas de crecemento económico de España, unidas ao bo comportamento do mercado laboral nos últimos anos, «fan que a previsión de contratación para a campaña do Nadal 2017-2018 sexa a mellor da historia en termos de creación de emprego», explican desde esta axencia. No caso de Galicia, conta con que haxa unha contratación dunhas 22.000 persoas, cunha subida do 13,7 %, moi por amais da media do conxunto das comunidades. Aí ten moito que ver o impacto das vendas no comercio minorista, no que a comunidade está tendo un comportamento mellor que o resto dos territorios de España. Segundo os seus datos, xeraranse polo menos 2.700 contratos máis que o pasado exercicio, que xa tivo unhas previsións moi optimistas.
«As boas previsións para a campaña de Nadal son a confirmación da recuperación do mercado laboral, xa que nos situamos ante a mellor cifra da historia tras cinco anos de crecemento consecutivo por amais dos dous díxitos», congratúlase Luis Pérez, director de relacións institucionais de Randstad. Efectivamente, desde o exercicio 2012-2013 o número de contratos realizados neste período ha ir crecendo sen pausa, de forma que naquela campaña se rexistraron pouco máis de 200.000 empregos, o que supón que neste próximo Nadal estarase preto de duplicar esta cifra. A crise provocou na campaña do 2008-2009 unha caída do 36 % das contratacións e a duras penas chegaron aos 185.000 postos, o dato máis baixo de toda a serie analizada.
Un Nadal máis, os sectores que lideran a creación de emprego son o comercio, a hostalería e o transporte e a loxística. É dicir, aqueles sectores relacionados co incremento do consumo e do turismo neste período. O que si cabe resaltar é que o comercio electrónico -que está a crecer na contorna do 25 %, segundo datos da CNMC- sitúase como un dos ámbitos onde máis se incrementa a demanda de profesionais, tal e como explica Randstad, que resalta o «incremento de oportunidades para empaquetadores, carretilleros, mozos de almacén ou transportistas, entre outros». De igual xeito, o comercio tradicional mantense como o principal dinamizador do emprego e búscanse perfís para dependentes, promotores, azafatos, comerciais... O terceiro gran sector é a restauración, que incorporar cociñeiros, camareiros ou axudantes de cociña.