A celebración da Noite Branca abriu a espita a un amplo abano de ofertas
23 jun 2019 . Actualizado ás 05:00 h.O comercio local adianta as rebaixas de verán e moitos escaparates xa hai días que teñen colocados os carteis. En Lalín a celebración da Noite Branca abre cada ano a espita dos descontos e a partir desa data, normalmente os establecementos xa ofrecen primeiro descontos puntuais nalgúns produtos ou empezan a ofrecer algún tipo de rebaixa, aínda que sexa pequena. Este ano non foi diferente e a dinámica mantívose, aínda que cunha diferenza nas datas.
Se o pasado ano a Noite Branca organizada polo Centro Comercial Aberto e a AED celebrábase o día 22, co que esas vantaxes á hora de comprar eran tan só algún día antes do inicio das rebaixas oficiais o 1 de xullo, este ano Lalín foise de Noite Branca o 14, dúas semanas antes do comezo tradicional do período de rebaixas estival.
Esta primavera local, meteorológicamente falando, tampouco beneficiou ao sector. Nesta época do ano unha parte importante das vendas constitúenas as pezas, accesorios e calzado para acudir a todo tipo de cerimonias. Con estes cambios bruscos de tempo que van desde días de choiva e frío a outros totalmente estivais, nas tendas quéixanse de que a clientela agarda ata última hora a comprar polo si ou polo non. Iso sen contar con que falamos de vodas, a maioría son en agosto e setembro e se outros anos comprar con moita antelación, nesta ocasión hai moitos que prefiren agardar ás rebaixas.
Un paseo polas rúas comerciais de Lalín deixa ver ofertas e descontos que van desde o mínimo 10 % ao 50 %. Mantense algún establecemento que continúa ofrecendo pezas de inverno cunha rebaixa do 70 % para desfacerse de estocaje.
A choiva que nos visita de forma intermitente tampouco axuda a vender roupa de baño, que é outro dos produtos que se poden comprar xa con rebaixas na capital dezana. Nos comercios as opinións van por barrios e aos que se sumaron xa ao carro das rebaixas hai os que se manteñen firmes e agardarán aínda uns días.
Uns non colgarán o cartel de rebaixas ata o día 1, mentres que outros anuncian que as adiantarán algunhas xornadas e empezarán a semana que vén.
Na Estrada, a Asociación de Comerciantes (Acoe) inicia a súa Campaña de Verán o vindeiro venres, día 28, cunha festa de animación que se enmarca dentro do programa do San Paio con actividades a partir das 17.00 horas e entre as que non faltarán os clásicos inchables para nenos ou a festa da espuma. As mascotas da agrupación percorrerán tamén as rúas e as compras poderán ter premio en forma de agasallos. Despois diso, día 30, comezarán de forma oficial as rebaixas, aínda que, do mesmo xeito que ocorre con Lalín, nestas xornadas previas xa moitos establecementos da localidade xa teñen colgados os carteis de rebaixas ou de descontos.
Unhas rebaixas que se suman en Lalín aos descontos que ofrecen algúns locais, nalgún caso por peche, e algún outro por liquidación por mor da xubilación dos seus propietarios.
Silleda e Vila de Cruces manteñen o calendario tradicional
Tanto en Silleda como en Vila de Cruces, os comerciantes agardarán, de forma maioritaria, ao comezo oficial das rebaixas de verán. Tanto a presidenta da asociación de comerciantes de Silleda, Yolanda Mato, como a da agrupación de comerciantes de Vila de Cruces, Lupe Pampín, comparten a opinión de que é imposible seguir o ritmo das grandes superficies e os grandes almacéns. En Cruces defenden que «nin Venres Negro nin Noites Brancas» pero si actividades promocionais propias que incentiven as vendas no comercio local.
A existencia de agrupacións de comercio locais non impiden que nalgunhas cuestións cada comerciante vaia por libre e tome a decisión que considere adecuada para o seu negocio. Hai cousas que os colectivos xa deixaron de intentar acordar porque era inútil pórse de acordo ou que todos acatasen a decisión. É o caso das aperturas dominicais, o Día do Cocido ou os domingos de feira, no caso de Lalín, por pór un exemplo. Outra cuestión na que reina o libre albedrío nas dúas comarcas é o inicio das rebaixas, sexa o período que sexa.
Por iso é polo que aínda que en Lalín e A Estrada adiántense máis as rebaixas que en Silleda e en Vila de Cruces, nestas dúas localidades tamén hai establecementos que ofrecen descontos e ofertas variadas.
O obxectivo común é vender tras unha tempada, din, con pouco movemento en xeral e con algúns momentos álxidos como a Noite Branca ou as vendas destinadas ás festas de gradación dos estudantes que animaron as vendas hai unhas semanas.