O colectivo apela a comprar nos comercios de proximidade
02 dic 2021 . Actualizado ás 05:00 h.Cun gran escaparate de premios doados por establecementos asociados a Ecos comezou oficialmente onte a campaña de Nadal da asociación; a máis ambiciosa, polo volume de obsequios e polo orzamento total que se destina á mesma. Cada día, e ata o próximo 23 de decembro, haberá un sorteo diario dun dos premios expostos nas antigas instalacións da tinturería silledense. Para facerse cos obsequios doados polos establecementos que colaboran na campaña será preciso recoller unha papeleta con cada compra que se realice nos locais Ecos e depositala na urna instalada ao efecto no local. Posteriormente o 26 de decembro celebrarase o gran sorteo entre todas as papeletas que non teñan sido premiadas con anterioridade, dándolle así saída á totalidade dos premios que aínda se manteñan nesa data no escaparate.
A campaña de Nadal do colectivo silledense inclúe ademais outro sorteo por un importe total de 1.700 euros en billetes Ecos. Para iso será preciso completar con dez selos, correspondentes a outros tantos establecementos locais, un tarjetón que entrará posteriormente nun sorteo de diferentes vales; haberá un primeiro por importe de 500 euros, dous serán por unha contía de 200 euros en billetes Ecos, tres premios serán de 100 e sortearanse outros dez premios por importe de 50 euros.
A asociación, que acaba de renovar a súa xunta directiva que preside Silvia López, fai un esforzo importante nesta iniciativa; unha das máis importantes das que canaliza ao longo do ano, ao obxecto de impulsar a compra nos locais do municipio e evitar os desprazamentos a grandes áreas ou a establecementos fóra da zona. De feito acaba de significar que «tes todo o que necesitas á volta da esquina», puntualiza a través das súas redes sociais, encomiando a calidade de calquera produto de proximidade. O colectivo contará coa colaboración do concello na próxima visita que fará Papá Noel a Silleda e Bandeira, que se escenifica todos os anos para deleite de pequenos e maiores, e con varios establecementos de hostalería que agasallarán chocolate con churros os xoves as compras que leven a cabo na vila. Ademais as panaderías Mella e Paulino e as pastelerías Tábora, Dulce Deza e Arco dá Vella do municipio volverán colaborar tamén co colectivo e nas súas roscas de Reyes esconderán 500 euros en billetes Ecos.