Unha moza emprendedora de 29 anos reabre o bar onde xa traballou a súa tía
02 dic 2021 . Actualizado ás 05:00 h.A sucesiva crise foron convertendo a activa rúa Cartaxena de Silleda nun baldío de locais baleiros. Se hai uns anos a zona era un referente en canto a establecementos hostaleiros e de lecer refírese, co paso do tempo foron pechando un a un e deixando a zona practicamente sen actividade. Recentemente abriu unha tenda de costura e punto e hoxe abre as súas portas un bar que pon unha pica na resurrección hostaleira desta antiga zona da movida silledense. Detrás do mostrador do establecemento estará Rocío Pena López, unha moza emprendedora de 29 anos, con experiencia na hostalería e que se embarca nesta aventura profesional con toda a ilusión do mundo. Terá a axuda da súa tía Pilar López Casal, que xa foi camareira en leste mesmo local, agora reformado.
Para o bautismo do bar, Rocío optou por tirar de raíces e botar man do nome co que se coñece á súa familia. Desta forma da casa dos Cotiño nace A D'Kotiño. A inauguración terá lugar hoxe ás 19.00 horas e «todos os clientes estarán invitados a unha primeira consumición», apunta Rocío Pena.
O establecemento abrirá ás 8.00 para empezar servindo almorzos e ofrecerá ao longo do día petiscos variados, tapas, bocadillos e elaborará comidas por encargo e tamén para levar.
Explica que «será comida caseira» e entre as especialidades estarán pratos tradicionais como a carne ao caldeiro ou os callos. Os almorzos terán tamén «o toque máis caseiro que poidamos REVISAR con biscoitos feitos na casa», cuenta.
Nas últimas semanas, Rocío Pena, contou «coa axuda de moita xente» para pór a punto o establecemento e un pouco ao seu gusto, aínda que, explica, «teño aínda algunha cousa pendente coas mesas de atrás que queda para un pouco máis adiante».
A súa tía Pilar , unha veterana da hostalería, non puido negarse a botar unha man á súa sobriña nesta aventura empresarial. A Pilar o local tráelle moitos recordos e rememora aqueloutros tempos de actividade continúa nunha rúa con moita vida que agora parece que querer volver a desperezarse. As obras de mellora non pasaron desapercibidos para os veciños. «Moitos parábanse a preguntar», comenta Rocío.
Na esquina que marca o arranque da rúa no cruzamento coa rúa Progreso está o Café Ina, e agora súmase á oferta hostaleira A D'Kotiño. Rocío Pena afronta o reto con moitas ganas de traballar e aínda que é consciente de que o momento non é moi bo para emprender confía en poder desenvolver neste negocio unha longa vida profesional.