A segunda edición do certame celébrase do 12 ao 15
04 ago 2021 . Actualizado ás 05:00 h.A Feira Internacional de Galicia Abanca será escenario, do 13 ao 15, da segunda edición dos Concursos Hípicos non Camiño. A primeira tivo lugar con éxito en Vedra o pasado mes de xullo. É unha cita que conta coa categoría de dúas estrelas. Para esta segunda edición os organizadores volven contar co recinto feiral de Silleda como escenario para estes concursos de saltos de cabalos.
Onte tivo lugar a presentación deste evento, que suma xa 112 participantes. O prazo de inscrición está aberto e os interesados poden apuntarse a través da páxina web da Federación Hípica Galega.
A presentación contou coa primeira tenente alcalde do Concello de Silleda, Mónica González. A edila resaltou a colaboración do Concello neste iniciativa destacando o atractivo do certame e a súa contribución a dinamizar Silleda xa que estas actividades atraen á zona a unha chea de visitantes.
Pola súa banda Javier Masaguer, presidente da Asociación Concursos Hípicos non Camiño, que organiza o evento, significou que Silleda volverá ser durante tres días un referente do mundo da hípica. Entre as probas incluiranse desde as cruzadas para xinetas e amazonas noveis ata a proba estrela de saltos que terá lugar o domingo, día 15. Ese día as barras situaranse a 1,35 metros para disputar o Gran Premio Feira Internacional de Galicia Abanca. Nesta cita, á parte deportiva súmase unha actuación musical cada unha das xornadas.
O director deportivo da agrupación, Diego Gómez, apuntou que eses tres días pretenden sentar as bases de cara a próximas edicións, apostando polo recinto feiral silledense. Os xinetes e amazonas, dixo, poderán gozar da renovada pista de quecemento. O director da Fundación Semana Verde, Ricardo Durán, mostrouse encantado de seguir acollendo este tipo de eventos.
Onte a entidade feiral e a agrupación aproveitaron para asinar un acordo de colaboración que marca a celebración doutros dous concursos de saltos no 2022 e 2023, ambas coa categoría de dúas estrelas. Os organizadores agardan que despois deses dous anos veñan moitos máis e que o certame sexa un referente.