Tras o repunte da pasada semana, de novo tocou onte sesión baixista na Central Agropecuaria de Galicia. Ao recinto feiral de Silleda chegaron menos reses, 822 fronte a 906, vendéndose na poxa 771 fronte ás 844 previas. Esa caída reflectiuse loxicamente no volume de negocio, que descendeu en máis de 21.000 euros, desde os 334.763 ata os 313.095 euros da pasada xornada.
Por seccións, foron 522 os becerros de recría que atoparon comprador dos 552 a poxa, por baixo dos 577 de 621 de fai sete días. O prezo medio subiu en 10 euros, desde 181 a 191, aínda que descendeu o volume de negocio, desde 104.968 aos 99.860 euros de onte. En canto a vacún maior, repuntó lixeiramente o número de cabezas, desde 209 a 212, vendéndose dúas máis que o día 22, cando foron 196 e esta vez 198. O prezo medio caeu en 20 euros, de 886 a 866, mentres a facturación baixou de 173.829 a 171.583 euros. De Vaca e Boi de Galicia comercializáronse catro exemplares, a un prezo de 1.233 euros.
Na Central de onte só houbo 58 tenreiros carniceiros, vendéndose 51, moi por baixo dos 76 e 71 respectivamente de hai unha semana. O prezo medio subiu en 28 euros, de 788 a 816 por unidade, mentres que a facturación baixou de forma significativa, de 55.966 a 41.652. Houbo 15 unidades de Tenreira Galega Suprema, a unha media de 1.003 euros.
Respecto das mesas de prezos, repetiron tanto porcino cebado como lechones e ovos, con lixeiro repunte das galiñas.