Segunda semana consecutiva en que se baten marcas na Central Agropecuaria de Galicia en Silleda. Nesta ocasión non só anual, senón en toda a historia da lonxa. O prezo medio dos becerros carniceiros vendidos situouse onte nos 918 euros, moi por amais dos 884,1 previos, de 22 de maio do 2018. Tras a afluencia masiva do día 18, con 1.108 reses, baixouse nesta ocasión a 998, dos que 929 atoparon comprador. A facturación global caeu en case 41.000 euros entre ambas as citas, desde os 512.101 aos 471.422 euros.
Por seccións, poxáronse 614 becerros de recría, adxudicándose 576 a unha media de 228 euros, 13 menos que fai sete días, mentres a facturación baixou ata os 131.435 euros fronte aos 152.469 previos. Respecto ao vacún maior, foron 290 as reses a poxa, con 269 vendidas, moi por baixo das 320 e 292 respectivamente do día 18. O prezo medio subiu en 43 euros, de 934 a 977, cunha facturación de 262.868 euros fronte aos 273.010 de hai unha semana. Para rematar, vendéronse 84 dos 94 becerros carniceiros a ese prezo medio histórico de 918 euros, fronte a 849 previos, con 77.119 euros facturados, por baixo dos 86.622 anteriores.
Caída dos lechones
Respecto das mesas de prezos, onte repetiron cotización galiñas de desvieje, ovos e porcino cebado, depreciándose en 2 euros os lechones.