Salvador JR, de Ponte Caldelas, e Xardineira PL foron elixidos campión e campioa
23 jun 2019 . Actualizado ás 21:10 h.Equina, organizada pola Asociación de Criadores de Cabalos Españois de Galicia (Accega) coa colaboración da Fundación Semana Verde despediuse onte en Silleda pondo fin a tres días de competicións que contaron coa participación de máis de 200 cabalos. Salvador JR, da gandería Santos Pereira de Ponte Caldelas e criado pola yeguada A Ciervina de Cáceres, foi o campión do V Campionato de España Pura Raza Española-ANCCE de Galicia.
A campioa do certame foi Xardineira PL da gandería Peñarredonda e Os Lombos de Salamanca e criada por Pedro Sánchez Gómez. O título de subcampioa tamén quedou en Galicia e obtívoo Espléndida de CH, da gandería Manuel Chamorro Rouco, de Vigo. O subcampión foi Gringo Mon da yeguada burgalesa A Montaraza. O Campión Novo foi Remate PG, da gandería Francisco Patiño Barreiro de Vilagarcía e a campioa nova, Oria de Vida, propiedade da gandería Jocha, de Arzúa e criada pola gandería Villanueva Dacasa da mesma localidade. Salvador RJ obtivo tamén o galardón aos mellores movementos en adulto e Resaca CPK, da gandería Carlos Soneira Romero de Santiago, conseguiu a mesma distinción na categoría de cabalos novos. A Yeguada Os Alcores de Valladolid foi elixida a mellor gandería. Accega concedeu o galardón ao mellor poldro nado en Galicia a Remate PG e a Minerva de Vida III, de Miguel Castro de Sobrado dos Monxes, o de mellor poldra nada en Galicia. O campionato foi clasificatorio para a final do mundo que se disputará en Sevilla do 9 ao 14 de novembro. Participaron 140 exemplares de ganderías de dez comunidades autónomas.
Dentro das competicións, onte tivo tamén lugar a oitava xornada de liga do Campionato Galego de Enganches que contou coa participación de preto de medio centenar de coches de cabalos procedentes de diferentes puntos de Galicia. O certame disputouse en seis categorías. O groso situouse nas modalidades Limonera e Troncos, con carruaxes de catro rodas, cun cabalo no caso da primeira, e de dúas na segunda. Diego Souto, da Estrada alzouse coa vitoria nas dúas modalidades.
Non foron as únicas probas, a estas sumáronse dúas de doma clásica que contaron con 40 binomios de Galicia e doutras provincias como Salamanca, Madrid, Valladolid ou Santander. Os gañadores en diferentes categorías do I Trofeo Xunta de Galicia-Medio Rural foron Leonor Neto, Xiana Pérez, Ainhoa Piñeiro, Nerea Goldar, Teresa González, Judit Babarro, Alejandro Nande, Clara Morazo, Leticia Neira e María José Mosteiro. Alejandro Nande gañou a XXI Copa Accega de Doma Clásica con Favila GF. O segundo posto foi para Leticia Neira con Lagoa IX e o terceiro para María José Mosteiro con Empaste AGS.