Baixo o lema De Tradición, a Banda de Música Municipal de Silleda festexará o 22 o Día dá Música. Contará coa Banda de Gaitas de Forcarei, Suso Vaamonde, Bouba, Xirandola e Pepe Vaamonde Grupo como artistas invitados. O programa de actividades arrincará ás 10.00 horas cun pasacalles desde a Escola de Música ata a carballeira das Pedrosas da banda forcaricense xunto aos cabezudos do Concello. Ás 11.00 comezarán as primeiras Olimpíadas Musicais, con actividades e xogos tradicionais nas Pedrosas.
O concerto didáctico De Tradición con Suso Vaamonde e o Ensemble de ventos e percusión da banda silledense comezará ás 12.30, seguido da presentación e degustación da Festa do Lacón. Ás 14.00 haberá comida de irmandade e ás 17.45 iniciarase un festival de fin de curso dos alumnos da Escola de Música. Xa ás 19.00 haberá degustación de tapas típicas da gastronomía galega, ofrecendo ás 20.00 horas un concerto a Banda de Silleda coa colaboración de varios artistas invitados. Despois haberá exhibición de baile tradicional con Xirandola, seguido de cea. Ás 23.45 será a queimada, música e fogos artificiais, con fogata de San Xoán. Despois, concerto de Pepe Vaamonde Grupo e verbena.