O vicepresidente da Xunta asistiu á inauguración da feira Cimag-GandAgro
22 feb 2019 . Actualizado ás 05:00 h.O recinto de Semana Verde en Silleda acolle desde onte e ata este sábado a terceira edición do certame agora bianual Cimag-GandAgro. Na súa inauguración oficial non faltaron discursos eloxiosos á decisión de fusionar ambas as feiras nunha para convertela na segunda máis importante do país. Nesta ocasión ocupando unha superficie de 12.700 metros cadrados, con 188 expositores directos e un total de 544 firmas representadas de 32 nacionalidades diferentes.
Un certame que presenta numerosas innovacións vinculadas ao sector agrario e gandeiro, con todo tipo de maquinaria, pero que tamén inclúe interesantes xornadas técnicas ao redor de diversos sectores, desde o porcino á avicultura, entre outros. Á inauguración acudiron o vicepresidente da Xunta, Alfonso Rueda, xunto co conselleiro de Medio Rural, José González, o delegado autonómico en Pontevedra, José Manuel Cores Tourís, e deputado provincial de cooperación, Carlos López Font, ademais do rexedor de Silleda, Manuel Cuíña, entre outros alcaldes da zona e autoridades.
Rueda congratulouse na súa intervención de que cada vez se organizan máis feiras e máis potentes en Semana Verde. «É un pequeno milagre facer feiras e que medren en expositores e superficie é que as cousas van ben», asegurou lembrando os anos duros que se pasaron no recinto silledense pero que agora «ou noso rural está potente e sae dá crise, hai máis capacidade económica». Aludiu á diversificación de feiras en Semana Verde, con quince o pasado ano que permitiron case a autofinanciación do recinto.
O conselleiro de Medio Rural destacou que estes certames permiten pór en valor o rural, ademais de incidir en distintas axudas promovidas desde a Xunta para o agro galego porque «é progreso, é futuro e é emprendemento». José González incidiu en apoiar os negocios do rural para xerar riqueza e emprego. O deputado provincial, Carlos López Font, resaltou o apoio desta institución para o sector agrogandeiro, aludindo á recente convocatoria de axudas a cooperativas con 200.000 euros de dotación, así como iniciativas este mandato para o sector primario por 1,65 millóns, recalcando a aposta da Deputación polo recinto feiral de Silleda.
O seu alcalde, Manuel Cuíña, significou que Cimag-GandAgro lembráballe aos comezos de Semana Verde cando se ía a ese certame a ver as novidades de maquinaria para gandeiros e agricultores. Congratulouse de que siga acudíndose cando as novas tecnoloxías nos achegan en casa calquera tipo de produto, cada ano con máis participantes. Mentres, o director de Semana Verde, Ricardo Durán, enxalzou este tipo de certames para promover o campo como fonte de riqueza social, tecnolóxica e xeográfica, cun factor multiplicador.
O titular de Medio Rural avogou por cambiar a norma do IRPF para os mozos gandeiros
No transcurso da feira desenvolveranse diversas xornadas técnicas e informativas, como a protagonizada onte polo conselleiro de Medio Rural dirixida a mozos que se acaban de incorporar á actividade agraria e gandeira. O pasado foron 382, máis de 9.000 desde o 2009, segundo destacou José González. Durante a súa intervención defendeu un cambio na normativa que regula o Imposto da Renda para as Persoas Físicas (IRPF) e beneficiar a tributación aos mozos que acaban de comezar o seu labor produtivo. De novo solicitarán esa modificación ao Goberno central e que a axuda percibida non tribute no primeiro ano na súa totalidade, repartíndose no período de amortización do activo adquirido e como mínimo durante cinco exercicios.
Un sistema automático de alimentación para vacún gañou o concurso de innovación
No concurso de innovación convocado con motivo do certame silledense o xurado integrado por dez expertos premiou un sistema automático de alimentación para gando vacún Lely Vector, presentado pola empresa Agrotec Entrecanales-Lely, entre as once propostas inscritas. Ademais outorgáronse varias mencións, unha deles a un recuperador de calor para avicultura da firma Rosber, mentres a segunda recaeu nun carro para transportar e depositar grellas de formigón de Agrícola Cacheda.
A innovación gañadora permite automatizar a distribución e aproximación do alimento nas explotacións de vacún, aforrando tempo ao gandeiro nesa rutina. Mide a comida existente no pesebre e en base a eses datos prepara a ración necesaria, cun sistema silencioso, de baixo consumo e seguro. O recuperador de calor para avicultura posibilita que se quente o aire que entra na granxa cando expulsa ao exterior o viciado, propiciando un aforro de combustible de calefacción e a mellora do benestar animal, ademais de reducir a mortalidade de aves. Mentres, o carro para transportar e depositar grellas de formigón deseñouse e fabricou en Silleda, evitando ao operario a manipulación directa de entre 80 e 150 quilogramos.
Ademais deste concurso tamén se premiaron un total de dezaoito máquinas destacadas de Cimag. Entre elas atópase unha cargadora telescópica Manitou de Cardelle Hidráulica; unha picadora de forraxe autopropulsada de Claas Ibérica; un sistema de medida da lonxitude da fibra de carros mesturadores Visiomix, de Electricidade Mario; unha desenrrolladora con pinzas de balas integrada ideal para cargadores frontais de Eurotechnics Agri; ou unha abonadora Amazone con axuste automático de distribución transversal mediante un radar e carro mesturador autopropulsado Storti.
Tamén se recoñeceron unha minicargadora articulada multifunción Avant do grupo Torneiro; unha roto-encintadora de Maquinaria Agrícola do Noroeste; un aplicador de xurros mixto ALP de Plumed; unha encintadora Alz para pacas redondas de Milleiros Torrón; un sistema de xiro variable en tractores de New Holland; unha trituradora abatible para pastos con dous cabezales solapados de Serrat Trituradoras; e un anciño hilerador de molinete horizontal de Stirmot. Para rematar, distinguiuse unha barra de turbos universal para a aplicación de xurro Mastek; unha rotoempacadora; e unha segadora.